لاہور (این این آئی ) بچت سکیموں کے شرح منافع میں رد و بدل کر دیا گیا، بہبود و پنشن سرٹیفیکٹ سمیت ریگولر، سپیشل اور ڈیفنس سیونگ سرٹیفیکٹ کا شرح منافع بڑھا دیا گیا۔نیشنل سیونگز نے مختلف بچت سکیموں کے شرح منافع میں رد وبدل کا اعلان کر دیا۔

سپیشل سیونگ کا شرح منافع ایک فیصد اضافے سے 11 فیصد، ریگولر سیونگ سرٹیفیکٹ کا شرح منافع میں اعشاریہ 84 فیصد اضافے سے 11 اعشاریہ 4 فیصد، بہبود اور پینشن سرٹیفیکٹ کا شرح منافع میں اعشاریہ 48 فیصد اضافے سے 12 اعشاریہ 72 فیصد اور ڈیفنس سیونگ سرٹیفیکٹ کا شرح منافع اعشاریہ 60 فیصد اضافے سے 10 اعشاریہ 92 فیصد کرنے کا اعلان کردیا گیا ہے۔سیونگ اکاونٹ کے شرح منافع میں کوئی ردوبدل نہیں کیا گیا، سیونگ اکاونٹ کا شرح منافع 8 اعشاریہ 25 فیصد پر ہی برقرار ہے۔ شرح منافع میں تبدیلی کا اطلاق یکم اپریل سے ہوگا۔معاشی تجزیہ کاروں کے مطابق ملک میں سیونگ کا کلچر بڑھانے کی خاطر بچت سکیموں کے شرح منافع میں اضافہ کیا گیا ہے، جس کے بعد اْمید کی جارہی ہے کہ آئندہ آنے والے دنوں میں بچت سکیموں میں عوام کی جانب سے بڑھ چڑھ کر سرمایہ کاری ہوسکتی ہے۔