لاہور( این این آئی)وفاقی وزیر خارجہ شاہ محمود قریشی اور وفاقی وزیر دفاع پرویزخٹک نے سپیکر پنجاب اسمبلی چوہدری پرویزالٰہی سے ان کی رہائشگاہ پر ملاقات کر کے موجودہ سیاسی صورتحال خصوصاً تحریک عدم اعتماد کے حوالے سے تفصیلی تبادلہ خیال کیا ، حکومتی وفد نے چوہدری پرویز الٰہی کو وزیراعظم عمران خان کا خصوصی پیغام بھی پہنچایا ۔
تفصیلات کے مطابق وفاقی وزراء شاہ محمود قریشی اور پرویز خٹک کا اپنی رہائشگاہ آمد پر چوہدری پرویز الٰہی نے طارق بشیر چیمہ اور چوہدری مونس الٰہی کے ہمراہ استقبال کیا ۔ ملاقات میں ملکی سیاسی صورتحال سمیت باہمی دلچسپی کے امور پر تبادلہ خیال کیا گیا ۔ اس موقع پر تحریک عدم اعتماد کے معاملے پر بھی تفصیلی گفتگو ہوئی ۔شاہ محمود قریشی اور پرویز خٹک نے چوہدری پرویز الٰہی کو وزیراعظم عمران خان کا خصوصی پیغام پہنچایا ۔ملاقات میں مسلم لیگ (ق) کے مرکزی رہنما طارق بشیر چیمہ نے ساڑھے تین سال میں پارٹی کو درپیش مسائل سے آگاہ کیا اور ان کے حل کیلئے کافی کھل کر بحث کی گئی ۔وفاقی وزراء نے کہا کہ وزیراعظم عمران خان کو اس ساری صورتحال سے آگاہ کریں گے ۔چوہدری پرویز الٰہی نے کہا کہ ملاقات کے حوالے سے پارٹی صدر چوہدری شجاعت حسین کو اعتماد میں لیں گے اور آئندہ ملاقات جلد اسلام آباد میں ہو گی۔ایک نجی ٹی وی کے مطابق ملاقات میں گلے شکوے بھی ہوئے۔(ق) لیگ کے رہنمائوں نے کہا کہ حکومت کے اتحادی ہیں لیکن ہر اہم موقع پر نظر انداز کیا گیا، چوہدری سالک حسین کا حلقہ ہو یا طارق بشیر چیمہ اتحادیوں جیسا سلوک نظر نہیں آیا، حکومت کے ساتھ ساڑھے تین سال رہے لیکن اتحادی مشاورت میں کہیں شامل نہ تھے، اتحادی ہونے کے باوجود اپوزیشن جیسا درجہ دیا گیا۔نجی ٹی وی کے مطابق شاہ محمود قریشی کا کہنا تھا کہ وزیر اعظم عمران خان اور ہمارے دل میں آپ کی بڑی عزت ہے، اتحاد کی ڈور کو مضبوط سے مضبوط ہونا چاہیے۔
