اسلام آباد(آن لائن ) سپیکر پنجاب اسمبلی چوہدری پرویز الہی نے کہا ہے کہ اس بات پر اتفاق ہوگیاہے کہ موجودہ اسمبلیاں اپنی مدت پوری کریں گی،موجودہ حالات میں ہم اپنا فیصلہ کرچکے ہیں، اس پر اپنے ساتھیوں سے حتمی مشاورت کررہے ہیں،مسلم لیگ ق، ایم کیو ایم اور بلوچستان عوامی پارٹی مل کر چل رہے ہیں۔،ا اپوزیشن اتحاد میں گئے تو وزارتوں سے استعفی دیں گے،شہباز شریف کے ساتھ ملاقات کسی بھی وقت ہوسکتی ہے،
وزیراعظم عمران خان کو اپنی کوششیں جاری رکھنا چاہئیں ۔تفصیلات کے مطابق وزیر اعظم کیخلاف اپوزیشن کی تحریک عدم اعتماد کے معاملے پر مسلم لیگ ق کا مشاورتی اجلاس اتوار کو منعقد ہوا۔ مسلم لیگ ق نے مشاورت پیر کو بھی جاری رکھنے پر اتفاق کیا ہے۔ ذرائع کے مطابق اجلاس میں ارکان کو اب تک کے اپوزیشن اور حکومت کے روابط پر اعتماد میں لیا گیا۔اتحادی جماعتوں سے مشاورت پر بھی بریفنگ دی گئی۔ ذرائع کا کہنا ہے کہ چوہدری برادران سے ترین گروپ کے رہنما عون چوہدری کی بھی ملاقات ہوئی۔ ملاقات میں اپوزیشن کی حمایت سے متعلق مشاورت ہوئی۔عون چوہدری نے واضح جواب کے لیے دو دن کی مہلت مانگ لی۔ ق لیگ ذرائع کا کہنا ہے کہ ایم کیو ایم، ق لیگ اور باپ کے درمیان اپوزیشن جماعتوں کی حمایت پر اتفاق ہو چکا ہے۔ دوسری جانب وزیراعظم کے نمائندہ خصوصی مولانا طاہرمحمود اشرفی بھی مسلم لیگ ق کو منانے میں ناکام لوٹ گئے۔ ذرائع کے مطابق طاہر محمود اشرفی نے اتوار کو سپیکر پنجاب اسمبلی چوہدری پرویز الہی سے ملاقات کی۔حافظ طاہر اشرفی حکومت کا پیغام لیکر چوہدری برادران کی رہائشگاہ پر آئے۔ طاہر اشرفی نے درخواست کی ہمارے پیغام پر بھی غور کیا جائے،مشکل وقت میں حکومت کے ساتھ رہیں۔ ذرائع ق لیگ کے مطابق ایک لیگی رہنما نے کہا کہ اب حکومت کو مزید ڈسکس نہ کریں۔ساڑھے تین سال جو ہمارے ساتھ کیا کافی ہے۔
بعد ازاں سپیکر پنجاب اسمبلی چوہدری پرویز الہی نے میڈیا سے گفتگو کرتے ہوئے کہا کہ اس بات پر اتفاق ہوگیاہے کہ موجودہ اسمبلیاں اپنی مدت پوری کریں گی۔آئین و قانون بڑا واضح ہے، اسپیکر قومی اسمبلی کو اس پر عمل کرنا چاہئیے،ہم اپنا فیصلہ کرچکے ہیں، اس پر اپنے ساتھیوں سے حتمی مشاورت کررہے ہیں،مسلم لیگ ق، ایم کیو ایم اور بلوچستان عوامی پارٹی مل کر چل رہے ہیں۔
انہوں نے کہا اپوزیشن اتحاد میں گئے تو وزارتوں سے استعفی دیں گے۔آج جہانگیر ترین گروپ کے عون چوہدری ملاقات کے لئے آئے تھے۔اگلے دو دن میں وہ بھی ہمیں اپنی حمایت کا بتائیں گے۔شہباز شریف کے ساتھ ملاقات کسی بھی وقت ہوسکتی ہے، وزیراعظم عمران خان کو اپنی کوششیں جاری رکھنا چاہئیں۔ادھر ذرائع کے مطابق مسلم لیگ ق اور ایم کیو ایم میں ملاقات طے پا گئی،یہ ملاقات پیر کو شام 7 بجے ہو گی۔ملاقات چوہدری شجاعت کی رہائشگاہ پر ہو گی۔
