اسلام آباد (مانیٹرنگ ڈیسک ٗ این این آئی)پیپلزپارٹی کو اسلام آباد کے ڈی چوک پر جلسے کی اجازت مل گئی، ضلعی انتظامیہ نے جلسے کیلئے این او سی جاری کردیا۔اجازت نامے میں کہا گیا ہے کہ جلسہ آج شام 4 بجے سے شروع ہوگا اور رات 8 بجے تک ختم کرنا ہوگا۔اجازت نامے کے مطابق نجی اور سرکاری املاک کو نقصان پہنچا تو اس کی ذمہ دار پیپلزپارٹی ہوگی۔

رپورٹس کے مطابق پی ڈی ایم قیادت نے پیپلزپارٹی کے اسلام آباد جلسے میں شرکت کا فیصلہ کیا ہے، اس حوالے سے مولانا فضل الرحمٰن نے پیپلزپارٹی قیادت کو آگاہ کردیا ہے۔دوسری جانب حکام نے ڈی چوک پر کنٹینرز پہنچادئیے ہیں، پارلیمنٹ اور شاہراہ دستور جانے والی سڑک بند کردی گئی ہے۔پیپلزپارٹی کے رہنما فیصل کریم کنڈی کا کہنا ہے عوامی مارچ کے لیے کشمیر اور خیبر پختونخوا سے آنے والے قافلوں کو روکنے کیلئے کنٹینرز لگا کر راستے بند کئے جارہے ہیں۔انہوں نے کہا کہ وزیراعظم عمران خان گھبراہٹ کا شکار تھے اور اب انھیں پسینے آنے شروع ہوگئے ہیں۔دوسری جانب پاکستان پیپلز پارٹی کے عوامی مارچ کیلئے ملک بھر سے آئے ہوئے جیالوں روات میں پڑائوڈالا ،مرغ چنے سے تواضع کی گئی ۔منگل کو پی پی پی کے سینیٹر مصطفی نواز کھوکھر کی جانب سے لانگ مارچ کے شرکاء کیلئے ناشتے کا اہتمام کیا گیا ہے اورجیالوں کی مرغ چنے، نان اور چائے سے تواضع کی گئی ،لانگ مارچ کا قافلہ براستہ ایکسپریس وے اسلام آباد میں داخل ہو گا جس کا آخری پڑائو ڈی چوک اسلام آباد ہو گا۔