راولپنڈی (این این آئی)صوبہ خیبرپختونخوا کے ضلع شمالی وزیرستان میں ملٹری پوسٹ میں گھسنے کی کوشش پر سکیورٹی فورسز نے خودکش حملہ آور کو مار گرایا۔
پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے ڈوسالی میں خودکش حملہ آور نے ملٹری پوسٹ میں گھسنے کی کوشش کی اور اہلکاروں پر چھوٹے ہتھیاروں سے فائرنگ کی۔آئی ایس پی آر کے مطابق خودکش حملہ آور نے اہلکاروں پر ہینڈ گرینیڈ سے حملے کی بھی کوشش تاہم سکیورٹی اہلکاروں کی جوابی کارروائی میں خودکش حملہ آور مارا گیا۔آئی ایس پی آرنے بتایا کہ ہلاک دہشت گرد سے اسلحہ اور گولہ بارود برآمد ہوا،مارے گئے دہشت گرد کی شناخت شریف کے نام سے ہوئی۔آئی ایس پی آر کے مطابق ہلاک دہشت گرد سکیورٹی فورسز کے خلاف دہشت گردی کی کارروائیوں میں ملوث تھا۔آئی ایس پی آر کے مطابق مقامی افراد نے سکیورٹی فورسزکی بروقت مؤثرکارروائی کوسراہا اور علاقے سے دہشت گردی کے خاتمے کیلئے مکمل حمایت کا اظہار کیا۔
