اسلام آباد (این این آئی)الیکشن کمیشن میں انٹراپارٹی انتخابات کیس میں ایم کیو ایم کے وکیل نے جواب دینے کیلئے وقت مانگ لیا ۔ بدھ کو دور ان سماعت ایم کیو ایم کے وکیل نے کہاکہ درخواست کی کاپی ملے تو ہی جواب دینے کی پوزیشن میں ہونگے۔ وکیل درخواست گزار نے کہاکہ انٹراپارٹی انتخابات کی جگہ بوگس کارروائی کی گئی۔الیکشن کمیشن نے آئندہ سماعت تک ایم کیو ایم پاکستان سے
جواب مانگ لیا ۔شاہد پاشا نے کہا کہ پارٹیوں کے اندر جمہوریت ہوگی تب ہی بہتری آئے گی۔ ممبر بلوچستان نے کہاکہ آپ کو درخواست دینے کا کہا ہے بحث نہ کریں، سیاست کرنے کا شوق ہے تو طریقہ کار بھی فالو کریں۔ شاہد پاشا نے کہاکہ دو سال پہلے درخواست بھجوائی تھی وہ کہاں ہے؟ ۔ ممبر سندھ نثار درانی نے کہاکہ دو سال پہلے کی بات نہ کریں، فریق بننا ہے تو درخواست دیں۔ بعد ازاں الیکشن کمیشن نے مزید سماعت 7 مارچ تک ملتوی کر دی۔سربراہ او آر سی ڈاکٹر فاروق ستار نے میڈیا سے گفتگو کرتے ہوئے کہاکہ ایم کیو ایم کئی سینئر ارکان نے الیکشن کمیشن میں جھرلو الیکشن کو چیلنج کیا ،پارٹی میں چند مفاد پرست لوگوں نے قبضہ کیا ہوا ہے ۔ انہوںنے کہاکہ نظریاتی سیاست کا پہلا شکار ہوا ہے اْس کے بعد باقی اراکین کو ہٹایا گیا ،وقت پر الیکشن نہیں پانچ سال بعد جھٹ پٹ الیکشن ہوا ۔انہوںنے کہاکہ لیاقت علی خان کی برسی پر الیکشن کا ڈھونگ رچایا گیا ،پارٹی پر ناجائز قبضہ کیا ہوا ہے یہ انوکھا الیکشن تھا ،الیکشن پراسس کو فالو نہیں کیا گیا الیکشن کو چیلنج کیا ۔ انہوںنے کہاکہ صاف شفاف الیکشن ملک میں بھی ہونی چاہئیں، پارٹیوں میں انٹرا پارٹی صاف شفاف ہونے چاہئیں۔
