لاہور( این این آئی)پیپلز پارٹی کی سنٹرل ایگزیکٹو کمیٹی کے اجلاس کی اندرونی کہانی سامنے آ گئی ۔ ذرائع کے کہنا ہے کہ اجلاس میں بلاول بھٹو نے واضح کیا کیا کہ موجودہ حکومت جا رہی ہے ، پیپلزپارٹی کو اپنا ہوم ورک مکمل کرنا ہے، آئندہ حکومت پیپلزپارٹی بنائے گی۔
نجی ٹی وی نے ذرائع کے حوالے سے کہا ہے کہ اجلاس میں بلاول بھٹو کا کہنا تھا کہ پیپلز پارٹی کوقومی،صوبائی اسمبلی کے امیدوارفائنل کرلینے چاہئیں، لانگ مارچ کے ذریعے ہم حکومت کو گھر بھجوا کر دم لیں گے۔ذرائع کے مطابق اجلاس میں اراکین نے (ن)لیگ کے ساتھ ماضی کے اتحاد کو مقبولیت میں کمی کا ذمہ دارٹھہراتے ہوئے کہا مسلم لیگ (ن)ہماری حریف ہے، (ن)لیگ کے ساتھ کیے گئے اتحاد سے پیپلزپارٹی کو سیاسی نقصان ہوا ، سب سے زیادہ نقصان پنجاب میں ہوا۔اجلاس میں پیپلزپارٹی کوآئندہ انتخابات میں سیاسی اورمذہبی جماعتوں سے اتحاد کے مشورے دیئے گئے اور پیپلزپارٹی کے تمام الائیڈ ونگز کی تنظیم نوکافیصلہ کیا گیا۔ذرائع نے بتایا پیپلز پارٹی کے تمام الائیڈونگزکے علیحدہ علیحدہ کنونشن منعقد کیے جائیں گے جس میں کسان کنونشن،اسٹوڈنٹس کنونشن،یوتھ کنونشن ، خواتین کنونشن،لائرزکنونشن،مزدورکنونشن کاجائزہ لیا گیا۔ذرائع کے مطابق پیپلزپارٹی نے الیکشن مانیٹرنگ سیل کے قیام کا بھی فیصلہ کرلیا۔
