کراچی(این این آئی)چیئرمین بلاول بھٹو زرداری نے کہاہے کہ پاکستان میں رواداری اور برداشت کو فروغ دینے کا واحد راستہ جمہوریت کی مظبوطی میں پنہاں ہے،عدم رواداری اور عدم برداشت کا رجحان معاشرے میں پھیل رہا ہے، جو ہر ذی شعور فرد کے لیئے باعثِ تشویش ہے۔ برداشت و رواداری کے عالمی دن پر اپنے پیغام میں بلاول بھٹو زر داری نے کہاکہ پاکستان میں رواداری اور

برداشت کو فروغ دینے کا واحد راستہ جمہوریت کی مظبوطی میں پنہاں ہے۔ انہوںنے کہاکہ عدم رواداری اور عدم برداشت کا رجحان معاشرے میں پھیل رہا ہے، جو ہر ذی شعور فرد کے لیئے باعثِ تشویش ہے۔ انہوںنے کہاکہ انتخابی دھاندھلییاں، غیرمنصفانہ فیصلے، آمریت کا بار بار مسلط ہونا اور جمہوریت کو پھلنے پھولنے سے روکنا اس کے اسباب ہیں۔انہوںنے کہاکہ ورنہ یہ سرزمینِ پاک تاریخی طور ہمیشہ رواداری پسند اور انسانیت دوست رہی ہے،دنیا میں اس وقت بین المسالک و بین المذاہب ہم آنگی کو فروغ دینے کی شدید ضرورت ہے۔ انہوںنے کہاکہ اس کی ضرورت جتنی آج ہے، ماضی میں شاید ایسی ضرورت کبھی رہی ہو۔ انہوںنے کہاکہ ہر شکل اور ہر سطح پر تعصب کا خاتمہ اور تحمل و اعتدال کو اختیار کرنا ہی، ایک پرامن و بقائے باہمی کے اصولوں پر مبنی عالمی معاشرے کی تشکیل کو جنم دے سکتا ہے۔بلاول بھٹو زرداری نے کہاکہ پیپلز پارٹی قائداعظم کے ویڑن، قائدِ عوام کے نظریئے اور شہید محترمہ بینظیر بھٹو کے فلسفے کی روشنی میں پاکستان کو برداشت و رواداری کا گہوارہ بنائی گی۔ انہوںنے کہاکہ یہ ہی وہ جدوجہد جس پر پیپلز پارٹی اپنے قیامِ کے پہلے دن سے عمل پیرا ہے۔