اسلام آباد (نیوز ڈیسک)سابق صدرپرویزمشرف نے کہاہے کہ پاکستان کی داخلی مضبوطی سب سے پہلی ترجیح ہونی چاہئے ،پاکستان کوکسی بیرونی ملک سے خطرہ نہیں ہے ،پاک بھارت تمام تنازعات کوباہمی مذاکرات کے ذریعے سے حل ہوسکتے ہیں،دونوں ممالک کے درمیان تنازعات کے حل ہونے کے بعدعلاقے میں زبردست معاشی ترقی آسکتی ہے ۔نجی ٹی وی سے گفتگوکرتے ہوئے سابق پرویزمشرف نے کہاکہ پاکستان کی پہلی ترجیح اندرنی انتشار کا خاتمہ ہو ناچاہئے ،ریاست کی دوسری ترجیح امن کے قیام اوراقتصادی بہتری ہونی چاہئے ،پاکستان کی جغرافیائی حیثیت ایک طاقت ہے ،پاکستان کواس کی اہمیت کاادراک کرکے اس سے فائدہ اٹھاناچاہئے ،دنیاکی نظریں ہمارے خطے پرہیں ،ہمیں اس کی اہمیت کواجاگرکرکے فائدہ لیناچاہئے ۔انہوںنے کہاکہ پاکستان سے لوگ اس لئے باہربھاگ رہے ہیں کہ انہیں نوکریاں نہیں مل رہی ہیں ،ہنرمندطبقے پاکستان کی ترقی اوراصل سرمایہ ہیں ۔انہوںنے کہاکہ اس وقت ملک کاسنگین مسئلہ کرپشن ہے ،اسے ختم کرناہوگا،اورسب سے پہلے اعلی سطح سے ختم کرناچاہئے ۔انہوںنے کہاکہ پاک بھارت تنازعات مذاکرات سے حل ہوسکتے ہیں ،تنازعات ختم ہونے سے معاشی پہیہ تیزی سے چل سکتاہے ،بھارت اگرباہمی مذاکرات کے ذریعے معاملات حل کرناچاہتاہے تومعاملہ عالمی سطح پراٹھاناچاہئے۔عالمی برادری بھی پاک بھارت باہمی مذاکرات پرزوردیتی ہے کہ دونوں ممالک کے درمیان تنازعات باہمی مذاکرات کے ذریعے حل ہوسکیں ۔انہوںنے کہاکہ1999ء میں اقتدارسنبھالاتوملک کی اقتصادی حالت بہت بدترتھی ،ملک کے ساتھ ایک ہفتے کے زرمبادلے کے ذخائرموجودتھے ۔انہوںنے کہاکہ ہم نے مشرقی پاکستان کے واقعے سے سبق نہیں سیکھا،اس سے سبق سیکھناچاہئے ،1971ء کے واقعے کے بعدمیں اپنی کمپنی کے سامنے روپڑاتھا۔