اسلام آباد (آن لائن) پاک بحریہ کے فضائی بیڑے میں پہلا جدید لانگ رینج میری ٹائم پیٹرول جیٹ ایئرکرافٹ شامل کر لیا گیا ۔ ترجمان پاک بحریہ کے مطابق امیرالبحر ایڈمرل محمد امجد خان نیازی تقریب
کے مہمان خصوصی تھے۔تقریب کے آغاز سے قبل نیول چیف نے کشمیری حریت رہنما کے انتقال پر تعزیت کا اظہار کیا۔ نیول چیف نے کشمیری حریت رہنما سید علی گیلانی کے لئے دعائے مغفرت کی۔ تقریب سے خطاب کرتے ہوے امیرالبحر ایڈمرل محمد امجد خان نیازی نے کہا پاک بحریہ عصر حاضر کے چیلنجز کا ادراک رکھتے ہوئے حربی آلات کو جدید تر بنانے کے لئے پر عزم ہے۔ انہوں نے کہا پاک بحریہ محفوظ بحری ماحول کو یقینی بنانے اورملکی بحری سرحدوں کی حفاظت کے لئے ہمہ وقت تیار ہے۔ .ترجمان پاک بحریہ کے مطابق شامل کیا جانے والاجہاز برازیل کا تیار کردہ دوہرے انجن والا ایمبریئر جیٹ ایئرکرافٹ ہے۔ اس نوع کے جہازدنیا بھر میں فضائی آپریشنز کے لئے استعمال کئے جا رہے ہیں۔ پاک بحریہ مستقبل میں اس نوع کے مزید دو جہاز فضائی بیڑے میں شامل کرے گی۔
