اسلام آباد (این این آئی)وزارت اقتصادی امور اور عالمی بینک کے درمیان پنجاب کے دیہی علاقوں میں صاف پانی کی فراہمی اور صفائی ستھرائی کے معاہدے پر دستخط کر دیئے گئے ،ورلڈ بینک پنجاب کے 16 اضلاع میں 2000 دیہات اور ان سے منسلک 8000 علاقوں کے لئے 442.4 ملین امریکی ڈالر فراہم کرے گا،دیہات کے ساٹھ لاکھ افراد پینے کے صاف پانی ، صفائی ستھرائی اور بچوں کی نشوونما کے اس منصوبے سے مستفید ہوں گے۔ عمر ایوب نے رکہاکہ اس منصوبے سے وزیر اعظم عمران خان کے لوگوں پر سرمایہ کاری اور ان کے معیار زندگی کو بہتر بنانے کے وژن کی عکاسی ہوتی ہے،اس منصوبے سے عام آدمی کو براہ راست فائدہ ہوگا اور دیہی علاقوں میں روزگار کے وسیع مواقع پیدا ہوں گے۔وفاقی وزیر نے پاکستان میں پائیدار معاشی ترقی کے لئے عالمی بینک کی مالی اور فنی معاونت کو سراہا۔اس منصوبے میں جنوبی پنجاب کے آٹھ اضلاع بہاولنگر ، بہاولپور ، ڈی جی خان ، لودھراں ، ملتان ، مظفر گڑھ ، رحیم یار خان اور راجن پور شامل ہیں۔وسطی اور شمالی پنجاب سے آٹھ دیگر اضلاع یعنی بھکر ، چکوال ، چنیوٹ ، جھنگ ، خوشاب ، میانوالی ، پاکپتن اور سرگودھا بھی منصوبے میں شامل ہیں ۔

موضوعات:عالمی بینک