اسلام آباد (این این آئی)وزیراعظم عمران خان نے کہا ہے کہ اونٹاریو واقعہ کے بعد ہر پاکستانی افسردہ ہے، اس اقدام کے خلاف سخت ایکشن ہونا چاہئے،آن لائن نفرت اور انتہا پسندی کے خلاف عالمی رہنما اقدامات کریں۔
نفرت پھیلانے والی ویب سائٹس کے خلاف بھی کارروائی کی جائے ۔عالمی نشریاتی ادارے کو انٹرویو میں وزیراعظم عمران خان نے اونٹاریو واقعے کے بعد حکومتوں پر نفرت اور انتہاپسندی کے خلاف اقدامات کرنے پر زور دیتے ہوئے کہا کہ آن لائن نفرت اور انتہا پسندی کے خلاف عالمی رہنما اقدامات کریں، نفرت پھیلانے والی ویب سائٹس کے خلاف بھی ایکشن ہونا چاہیے۔وزیرِ اعظم نے کہاکہ اس معاملے کو کینیڈین وزیرِ اعظم جسٹن ٹروڈو کے ساتھ بھی اٹھایا ہے۔عمران خان نے کہا کہ کینیڈین وزیرِ اعظم جسٹن ٹروڈو اسلامو فوبیا اور نفرت انگیز مواد کے خلاف اقدامات کو سمجھتے ہیں۔انہوں نے کہا کہ عالمی رہنمائوں نے جب اس پر ایکشن لینے کا سوچا وہ نمٹ لیں گے، مغربی ممالک کے رہنما اس بات کو سمجھے ہی نہیں۔وزیرِ اعظم عمران خان نے کہا کہ بطور انسان آپ کو آزادی ہے، مگر آپ کے فعل سے کسی دوسرے کو تکلیف نہ پہنچے۔
