اسلام آباد(مانیٹرنگ ڈیسک)نجی ٹی وی جیو نیوز کے مطابق بر طانوی شہری میاں عمران نے دعویٰ کیا ہے کہ نواز شریف پر کوئی حملہ نہیں ہوا ،میاں صاحب کے رائٹ ہینڈ ناصر بٹ کے ساتھ لین دین تنازع تھا عدالتی بیلف آرڈر کی تعمیل کرانے آیا تھا حملے کا ڈرامہ رچایا گیا ،
دوسری جانب وزیر اعظم کے معاون خصوصی شہباز گل کا کہنا ہے کہ مریم نواز نے نوازشریف پر حملے کا جو شوشہ چھوڑا اس کی حقیقت یہ ہے کہ ان کے پروردہ ناصر بٹ نامی شخص جو طبیعتاً فراڈیہ ہے نے ایک جیپ میاں عمران نامی شخص کو لندن میں جعلسازی سے فروخت کی جو یہ سمجھتے تھے کہ جس طرح انہوں نے پاکستان کو اپنے فراڈ کا محور بنارکھاتھااسی طرح لندن میں بھی ہوگا لیکن اس فراڈ پر میاں عمران نے لندن کی عدالت سے رجوع کیا جس کا نتیجہ یہ نکلا کہ عدالت نے ناصر بٹ کے خلاف فیصلہ دیتے ہوئے کہاکہ اس کا گھر بیچ کر اس کی رقم میاں عمران کو اداکی جائے مگر جب چار پانچ لوگ اس عدالتی فیصلے کی اطلاع دینے کیلئے ن لیگ کے لندن آفس گئے تو انہوں نے حملے کا ڈرامہ بنا لیا اس طرح لندن کی حکومت کو بدنام کرنے کی کوشش کی گئی کیونکہ اس سے یہ تاثر قائم ہوا کہ جیسے خدانخواستہ لندن بھی غیر محفوظ ملک ہے اس لئے ہم لندن کی حکومت کو پیغام دینا چاہتے ہیں کہ وہ ایسے لوگوں سے جان چھڑائیں جو لندن کی بدنامی کا باعث بن رہے ہیں کیونکہ ایسی اطلاعات سن کر دنیا کے سیاح غیر محفوظ سمجھتے ہوئے لندن کا رخ نہیں کریں گے جس سے انہیں معاشی نقصان کا سامنا کرنا پڑسکتا ہے۔
