کراچی (نیوزڈیسک)کراچی کے طلبا نے مریض اور ڈاکٹر کے درمیان رابطے اور ڈاکٹر کو مریض کی صورتحال سے بذریعہ اسمارٹ فون آگاہی کیلئے ہیلتھ مانیٹرنگ سسٹم تیار کرلیا ہے۔اقرا یونیورسٹی ٹیلی کمیونیکیشن انجینئرنگ ڈیپارٹمنٹ کے مرزا دانیال بیگ ،شیما سلیم،عبدالماجد اور محمد عمر پر مشتمل طلبہ کے گروپ نے پروجیکٹ سپروائز پروفیسر حسن عادل اور ڈاکٹر کامران رضا کی رہنمائی میں یہ اینڈرائڈ بیسڈ وائرلیس باڈی ایریا نیٹورک فار ای ہیلتھ مانیٹرنگ سسٹم تیار کیا ہے۔انٹرنٹ سے منسلک ہونے کے بعد ہیلتھ مانٹرنگ کے اس نظام کے ذریعے ڈاکٹر کو مریض کی جسمانی صورتحال سے آگاہی دے کر مشورہ حاصل کیا جاسکتا ہے،یہ نظام چھوٹے شہرو ں کے مریضوں کیلئے ایک نعمت ثابت ہوگا، جہاں بڑے ڈاکٹر زنہیں ہوتے اور مریضوں کو علاج کی غرض سے بڑے شہروں کا رخ کرنا پڑتا ہے ،اب وہ باآسانی ڈاکٹر کو مرض کی کیفیت سے آگاہی کے ساتھ مشورہ کرسکیں گے۔اس سسٹم کو استعمال کرنے کیلئے مریض کو چندآلات مثلا ای۔سی ۔جی، باڈی ٹمپریچر، ہارٹ ریٹ، شوگر، بلڈپریشر، تنفس اور دیگر بیماریوں کی صورتحال سے آگاہ کرنے کے لئے اپنے جسم سے منسلک کرنا ہوگا مزید یہ آلات ایک کنٹرولر سےجوڑنا ہونگے جو مریض کے ہیلتھ ڈیٹا کو لیپ ٹاپ اور اسمارٹ فون دونوں پربھیج دےگا اور مریض ڈاکٹر سے فوری طور پر دوائیوں کے استعمال کے بارے میں مشورہ حاصل کرسکے گا۔ یہ پاکستان کی تاریخ میں ایک اہم ایجاد ہے جوکہ مریض اور ڈاکٹر جہاں کہیں بھی ہوں رابطے کا ایک اہم ذریعہ ثابت ہوسکے گا۔