اسلام آباد(آن لائن )جمعیت علماء اسلام (ف ) کے سینیٹر مولانا عبدلغفور حیدری نے کہا ہے کہ پیپلز پارٹی نے سیاسی خودکشی کر لی ہے،معافی کس بات کی غلطیاں اور چالاکیاں وہ کریں اور معافی ہم کیسے مانگیں ،حکومت کے خلاف تحریک وہی چلا سکتے ہیں جنھوں نے کشتیاں جلا رکھی ہوں۔  جے یو آئی کا ردعمل دیتے ہوئے سینیٹر مولانا عبدلغفور حیدری نے کہا کہ پیپلز پارٹی استعفے اس وقت دیتی جب انہوں نے باپ سے ووٹ لیے تھے۔ پیپلز پارٹی درپردہ عمران خان کی حکومت اور اسٹیبلشمنٹ کو سہارا دے رہی ہے۔ پیپلز پارٹی جو کر رہی اس کو

جواب عوام اگلے الیکشن میں اسے دیں گے۔ اس سوال پر کہ کیا پی ڈی ایم اے این پی اور پیپلز پارٹی سے معافی مانگے گی؟ مولانا غفور حیدری کا کہنا تھاکہ معافی کس بات کی غلطیاں اور چالاکیاں وہ کریں اور معافی ہم کیسے مانگیں۔ ہمیں پیپلز پارٹی کے جانے کی خوشی ہوئی کہ اب ہم یکسوئی سے تحریک چلائیں گے۔ ایک اورسوال پر کہ کیا پی ڈی ایم کے دوبارہ اکھٹے ہونے کوئی گنجائش ہے ؟مولانا غفور حیدری نے کہا کہ پیپلز پارٹی کی پی ڈی ایم میں واپسی کا صرف ایک ہی راستہ ہے۔ یوسف رضا گیلانی استعفیٰ دیں اس کے بعد اگلی بات ہو گی۔