اسلام آباد (این این آئی)سینیٹ اجلاس میں مسلم لیگ (ن )کے سینیٹر اعظم نذیر تارڑ نے کہا ہے کہ اپوزیشن لیڈر بنانے کیلئے 5 تحفے بھجوائے گئے، اپوزیشن لیڈر کی تقرری پر ہمارے دل رنجیدہ ہیں، ہمیں الگ اپوزیشن بینچ الاٹ کیے جائیں۔چیئرمین سینیٹ صادق سنجرانی کی

زیرصدارت سینیٹ کا اجلاس ہوا جس میں اظہار خیال کرتے ہوئے مسلم لیگ (ن )کے سینیٹر اعظم نذیر تارڑ نے کہا کہ سینیٹ الیکشن میں خفیہ کیمروں کی تحقیقات کی جائیں۔اعظم نذیر تارڑ کے ریمارکس پر گیلانی کی حمایت کرنے والے سینیٹرز نے احتجاج کیا ،بی اے پی کے سینیٹرز کو تحفہ کہنے پر حکومتی اراکین کی جانب سے ہنگامہ اور ایوان میں شور شرابا کیا گیا۔لیگی سینیٹر نے کہا کہ پانچ جماعتوں کے27 سینیٹرز نے الگ اپوزیشن گروپ بنایا ہے ہمیں الگ اپوزیشن بینچ الاٹ کیے جائیں، اپوزیشن مثبت اور تعمیری کردار ادا کرے گی، ہم 5 جماعتیں آزاد گروپ کی حیثیت سے اپوزیشن نشستوں پر بیٹھیں گے۔سینیٹ اجلاس کے دوران یوسف رضا گیلانی کی حمایت کرنے والے دلاور خان گروپ نے بھی الگ نشستیں مانگ لیں۔