لاہور( این این آئی)پاکستان موبائل فون مینوفیکچررز ایسوسی ایشن نے حکومتی سطح پر ’’میڈان پاکستان‘‘مہم چلانے کامطالبہ کرتے ہوئے کہا ہے کہ عوام کواس جانب راغب کرنے کیلئے حکومتی ،سیاسی اورمختلف شعبوں کی نامورشخصیات رول ماڈل بنیں، برانڈز اورپر تعیش

مصنوعات کی درآمد پر سالانہ اربوں ڈالرکا قیمتی زرمبادلہ خرچ ہوتاہے جسے اس مہم کوکامیاب بنا کر ایک حد میں لایا جاسکتا ہے ۔ ان خیالات کااظہار ایسوسی ایشن کے ڈپٹی وائس چیئرمین سردارخان نے اپنے دفتر میں ممبران کے وفدسے ملاقات میں گفتگو کرتے ہوئے کیا ۔ اس موقع پر موبائل مینو فیکچررزکو درپیش مسائل بھی زیر غورآئے  ۔ سردارخان نے کہا کہ پاکستان ایسی مصنوعات کی تیاری کر رہا ہے جو معیار میں کسی بھی غیر ملکی برانڈ سے کم نہیںلیکن اس کے باوجود ہم بیرون ممالک سے منگوانے کو ترجیح دیتے جس پر اربوں ڈالر زکاقیمتی زرمبادلہ خرچ ہوتاہے۔ انہوںنے کہا کہ ہمیں ’’میڈ ان پاکستان ‘‘کو ترجیح دینی چاہیے اورفخرسے اس کی تشہیربھی کرنی چاہیے تاکہ ہمارے ملک کی صنعتیں مزیدعروج حاصل کریں جس سے ہماری مقامی معیشت بھی ترقی کرے گی ۔سردارخان نے کہا کہ ’’میڈان پاکستان ‘‘مہم کی کامیابی کے لئے اعلیٰ حکومتی اورسیاسی شخصیات رول ماڈل بنیںاوراس کے ساتھ کھیلوںاور شوبز سمیت دیگر شعبوں کی نامور شخصیات کوبھی اس میں اپنا کردار ادا کرناچاہیے ۔