مکہ مکرمہ (نیوزڈیسک )سعودی حکومت نے اعلان کیا ہے کہ حج کے لئے آنے والے تمام مقامی اور غیر ملکی عازمین کے لئے گردن توڑ بخار سے حفاظت کا ٹیکہ لگوانا لازمی ہے۔ حاجیوں کی صحت کے تحفظ کے لئے انہیں اانفلو ئنرا سے بچاو کا ٹیکہ لگوانے کی بھی ہدایت کی گئی ہے۔ سعودی وزارت صحت کے ترجمان خالد المرغلانی نے بتایا ہے کہ ان کی وزارت کی درخواست پر سعودی وزارت خارجہ نے دنیا بھر میں اپنے سفارتی مشنوں کو ہدایت کر دی ہے کہ حج ویزے جاری کرنے سے پہلے متعددی بیماریوں کی روک تھام کے لئے سعودی ضوابط کی پابندی کریں اور صرف ایسے درخواست گزاروں کو ہی ویزے جاری کریں جو حفاظتی ٹیکے لگوانے کا سرٹیفکیٹ مہیا کریں-انہوں نے بتایا ہے کہ عازمین حج کے لئے سعودی عرب پہنچنے سے کم ازکم دس دن پہلے حفاظتی ٹیکے لگوالینا ضروری ہے ۔ پاکستان سے اس سال حج کے لئے آنے والوں کے لئے گردن توڑ بخار اور پولیو، انفلوئینزا کی ویکسین پر خصوصی توجہ دی جار ہی ہے ۔ سعودی عرب میں داخلے کے 14راستوں پر محکمہ صحت کی خصوصی ٹیمیں تعینات کی جائیں گی جو عازمین حج میں سے بیماریوں سے متاثرہ افراد کو علیحدہ کریں گی ۔ انہوں بتایا کہ مملکت میں پہنچنے والے تمام غیر ملکی حاجیوں کو پولیو کے قطرے ایئر پورٹ پر ہی پلائے جائیں گے ۔