مدینہ منور (نیوزڈیسک)رمضان المبارک کا آخری عشرہ قریب آتے ہی مسجد الحرام میں عمرہ کے لئے آنے والوں کی تعداد میں بے پناہ اضافہ ہو گیا ۔ انتظامیہ کی طرف سے مسجد کی صفائی کے لئے تین ہزار کارکن تعینات کئے گئے ہیں جو ہر روز نماز مغرب کے فورا ً بعد صرف 55منٹ میں مسجد کی پوری عمارت کو دھو کر صاف کر دیتے ہیں ۔ مسجد کا تعمیر شدہ رقبہ 23لاکھ 88ہزار مربع میٹر جبکہ کعبہ کے گرد طواف کے لئے استعمال ہونے والے صحن(مطاف) کا رقبہ 2لاکھ 17ہزار مربع میٹر ہے ۔ طواف کرنے والوں کے ہجوم کے باوجود اس صحن کی صفائی20 منٹ میں مکمل کر لی جاتی ہے اور اس کام میں بہت کم پانی استعمال کیا جاتا ہے ۔ مسجد کے اندر سے روزانہ 100ٹن استعمال شدہ اشیاء بھی اکٹھی کی جاتی ہیں ۔