ریاض (نیوزڈیسک)سعودی عرب کی قیادت میں اتحادی ممالک کے لڑاکا طیاروں نے یمنی دارالحکومت صنعا میں سابق صدر علی عبداللہ صالح کی جماعت جنرل پیپلز کانگریس کے ہیڈ کوارٹرز کو فضائی حملوں میں نشانہ بنایا جنرل پیپلز کانگریس کی اسسٹنٹ سیکریٹری جنرل فائقہ السید نے بتایا کہ اتحادی طیاروں کی بمباری سے جماعت کا ہیڈ کوارٹرز مکمل طور پر تباہ ہوگیا انھوں نے اپنی جماعت کی ویب سائٹ پر جاری کردہ ایک بیان میں کہا کہ اس طرح کے حملوں سے ہم اقوام متحدہ کے ساتھ تعاون کےلئے سازگار ماحول پیدا کرنے کی غرض سے اپنی کوششوں سے پیچھے نہیں ہٹیں گے سعودی عرب کی قیادت میں اتحادی ممالک کے لڑاکا طیاروں نے صنعا کے جنوبی اور مغربی علاقوں میں سابق صدر علی صالح کے ایک بھتیجے کے مکان سمیت حوثیوں کے متعدد حامیوں کے مکانوں کو بھی فضائی حملوں میں نشانہ بنایا ۔سابق حکمراں جماعت کے ہیڈ کوارٹرز پر ایسے وقت میں بمباری کی گئی جب یمن کےلئے اقوام متحدہ کے خصوصی ایلچی اسماعیل ولد شیخ احمد صنعا میں تھے اور وہ رمضان المبارک میں انسانی بنیاد پر حوثی ملیشیا کی قیادت سے جنگ بندی کےلئے بات چیت کررہے تھے۔قبل ازیں انھوں نے سعودی اتحاد اور جلاوطن یمنی صدر عبد ربہ منصور ہادی کی حکومت کے نمائندوں سے بات چیت کی تھی۔