پشاور (نیوزڈیسک) امریکی سفیر رچرڈ اولسن نے کہا ہے کہ دہشت گردوں کے خلاف جاری پاک فوج کے آپریشن ضرب عضب کے نتائج انتہائی متاثرکن ہیں‘ اب وقت آگیا ہے کہ جنوبی ایشیا میں پراکسی وار کو اختتام پذیر ہوجانا چاہیے‘ اس سے قطع نظر کہ خطے میں ان جنگوں کے پیچھے کون ہے۔پاکستان کی فوج اورانتظامیہ انتہائی منظم ہیں ‘ داعش کیلئے یہاں جگہ بناناممکن نہیں۔پشاور میں میڈیا سے گفتگو کرتے ہوئےرچرڈ اولسن نےاعتراف کیا کہ پاک فوج نے آپریشن میں متعدد کامیابیاں حاصل کرلی ہیں‘ہمارا ماننا ہے کہ اس آپریشن کے ذریعے پاکستان آرمی نے دہشت گردوں کو شکست دی ہے جو کہ پاکستان کے عام شہریوں کے ساتھ ساتھ افغانستان کے لیے بھی فائدے مند ہے‘ آپریشن کے نتائج انتہائی متاثر کن ہیں‘ڈرون حملوں کے سوال پر امریکی سفیر نے کہا کہ کچھ واضح وجوہات کی بنا پر اس قسم کے انسداد دہشت گردی آپریشن پر بات نہیں کرسکتے‘داعش کی موجودگی کے ایک سوال پر رچرڈ اولسن نے کہا کہ داعش کے مسئلے پر انتہائی قریب سے نظر رکھے ہوئے ہیں‘اس مسئلے پر پاکستانی حکام سے بات چیت کی گئی ہے تاہم پاکستانی حکام کا کہنا ہے کہ ان کو اب تک یہاں داعش کی موجودگی کے شواہد نہیں ملے ہیں‘ وسطی ایشیا کی ریاستوں میں داعش کو وہاں کی حکومتوں میں موجود کمزوریوں کے باعث جگہ بنانے میں مدد ملی تاہم پاکستان کے معاملے میں ایسا ممکن نظر نہیں آتا کیونکہ ریاست کی انتظامیہ اور فوج انتہائی منظم ہیں۔