اسلام آباد (نیوز ڈیسک)سپارکو نے ذوالحج 1447 ہجری کے چاند سے متعلق ممکنہ پیشگوئی جاری کرتے ہوئے کہا ہے کہ

17 مئی 2026 کی شام چاند نظر آنے کے امکانات کافی روشن ہیں۔میڈیا رپورٹس کے مطابق سپارکو کے ترجمان نے بتایا کہ نئے قمری مہینے کا چاند 17 مئی کو رات 1 بج کر 1 منٹ پر پیدا ہونے کی توقع ہے۔ غروبِ آفتاب کے وقت چاند کی عمر تقریباً 18 گھنٹے 30 منٹ ہوگی، جو رویت کے لیے موزوں سمجھی جا رہی ہے۔سپارکو کے مطابق پاکستان کے ساحلی علاقوں میں سورج غروب ہونے اور چاند غروب ہونے کے درمیان تقریباً ایک گھنٹے کا فرق متوقع ہے، جس کے باعث چاند دیکھے جانے کے امکانات مزید بڑھ جاتے ہیں۔فلکیاتی حسابات کی بنیاد پر یکم ذوالحج 1447 ہجری 18 مئی 2026 بروز پیر ہونے کا امکان ظاہر کیا گیا ہے، جبکہ عیدالاضحیٰ 27 مئی 2026 کو متوقع ہے۔ترجمان نے یہ بھی واضح کیا کہ اسلامی مہینے کے آغاز اور عید کی تاریخ کے حتمی اعلان کا اختیار مرکزی رویتِ ہلال کمیٹی کے پاس ہے، جو ملک بھر سے موصول ہونے والی شہادتوں اور چاند دیکھنے کی مصدقہ اطلاعات کی بنیاد پر فیصلہ کرے گی۔