کراچی(این این آئی) مقامی بینکوں کے ڈپازٹس میں اگست 2020 کے دوران 206 ارب روپے کا اضافہ ریکارڈ کیا گیا ہے نتیجے میں اگست 2020 میں بینکوں کے ڈپازٹس کی مالیت بڑھ کر 16 ہزار 327 ارب روپے کی ریکارڈ سطح پر پہنچ گئی۔اسٹیٹ بینک آف پاکستان کے اعداد و شمار کے مطابق جولائی 2020 میں بینکوں کے ڈپازٹس کی مالیت 16121 ارب

روپے تھی جبکہ جنوری 2020 سے اگست 2020 کے اختتام تک مقامی بینکوں کے ڈپازٹس کی مالیت میں مجموعی طورپر 1655 ارب روپے کا اضافہ ہوا۔اسٹیٹ بینک کے مطابق جنوری 2020 سے اگست 2020 تک بینکوں کے ڈپازٹس کی مجموعی مالیت 14 ہزار 672 ارب روپے سے بڑھ کر 16 ہزار 327 ارب روپے کی سطح پر پہنچ گئی ہے۔