لاہور(نیوزڈیسک)ٹریفک وارڈ ن پر تشدد کے الزام میں پی ٹی آئی کے سربراہ عمران خان کے تین بھانجوں کے خلاف تھانہ ریس کورس میں مقدمہ درج کرکے دو کو گرفتار کر لیاجبکہ فرار ہونے والے تیسرے بھانجے کی گرفتاری کےلئے کوششیں شروع کر دی گئی ہیں ۔ بتایا گیا ہے کہ جیل روڈ پر ٹریفک وارڈن شکیل نے سیٹ بیلٹ نہ باندھنے پر عمران خان کے بھانجوں کو روکا اور تلخ کلامی ہونے پر عمران خان کے بھانجوں نے تشدد کر کے ٹریفک وارڈن کو زخمی کر دیا اور یونیفارم بھی پھاڑ دی ۔ ٹریفک وارڈن کی کال چلانے پر پولیس موقع پر پہنچ گئی اور عمران خان کے بھانجوں اور ٹریفک وارڈن کو تھانہ ریس کورس لایا گیا جہاں وارڈن شکیل کی درخواست پر عمران خان کے بھانجوں عظیم ، عبد اللہ اور احسان کے خلاف دفعہ 147،149،353،506اور 186کے تحت مقدمہ درج کر لیا ۔بتایا گیا ہے کہ احسان موقع سے فرار ہو گیا جس کی گرفتاری کےلئے چھاپے مارے جارہے ہیں،عمران خان کے بھانجوں کی گرفتاری اور تیسرے بھانجے کی گرفتاری کیلئے چھاپوں کے بعد تحریک انصاف اور حکومت کے درمیان مزید کشیدگی پیداہوگئی ہے، لاہور میں متعدد علاقوں میں تحریک انصاف کے ورکرزمشتعل ہوگئے اورسڑکوں پر نکل آئے ۔