پیرس(نیوز ڈیسک) کرونا وائرس نے 152 ممالک کو اپنی لپیٹ میں لے لیا، دنیا بھر میں مرنے والوں کی تعداد 5 ہزار 840 ہو گئی، یورپ میں صورتحال بے قابوہوگئی ،اٹلی کے بعد فرانس اور اسپین میں بھی سخت پابندیاں عائد کر دی گئیں، وائرس سے دنیا بھر میں ایک لاکھ چھپن ہزار سے زائد افراد بیمار ہوئے، جن میں سے پچھتر ہزار نو صحت یاب ہوچکے ہیں۔عالمی ادارہ صحت نے کہا ہے 24 گھنٹوں میں چین سے باہر دس ہزار کیسز رپورٹ ہوئے ہیں۔
خطرناک وائرس یورپ میں تیزی سے پھیل رہا ہے، اٹلی میں چین کے بعد سب سے زیادہ ہلاکتیں ہوئیں۔ یورپ کے مختلف ممالک میں ہنگامی اقدامات کیے جا رہے ہیں۔کورونا کی وجہ سے اسپین میں لاک ڈاون کا اعلان کردیا گیا ہے۔اسپین میں 15دنوں کے لیے ہنگامی صورتحال نافذ کردی گئی ہے جبکہ فرانس اور اسپین میں کاروباری مراکز اور ریسٹورنٹ بند کر دیئے گئے، حکام نے عوام کو ضروری اشیا خریدنے کے علاوہ گھروں سے باہر نکلنے سے روک دیا۔یورپ میں اسٹورز پر رش بڑھ گیا، جگہ جگہ جھگڑے دیکھنے میں آئے، برطانیہ، اسپین، فرانس، پولینڈ میں لوگوں کو اشیا کی قلت کا سامنا کرنا پڑا، اٹلی میں بھی گلیاں اور سڑکیں ویران ہو گئی ہیں۔وائٹ ہاوس نے صدر ٹرمپ کی رپورٹ منفی آنے کی تصدیق کر دی، واشنگٹن کے معروف میوزیم کو بند کر دیا گیا، امریکا نے برطانیہ اورآئرلینڈ پربھی سفری پابندیاں عائد کر دیں۔ایران میں مزید 97 افراد جان سے گئے، سعودی عرب میں وائرس سے متاثرہ افراد کی تعداد 103 ہو گئی۔ برطانیہ میں ایک ہی دن میں دس افراد ہلاک ہوئے، اٹلی میں مزید 175 ہلاکتیں ہوئیں، فرانس میں 91 اموات، اسپین میں مزید 63 اور فرانس میں 12 افراد لقمہ اجل بن گئے۔اس کے علاوہ سوئٹزر لینڈ،ہالینڈ، ناروے، ڈنمارک اورسوئیڈن میں چھ افراد ہلاک ہوئے ہیں۔کورونا کی وجہ سے جرمنی کے شہر برلن اور کولون نے بارز، کلب ،سنیما، تھیٹر اور کانسرٹ ہال بند کردیئے گئے ہیں۔ مصر نے کورونا وائرس کی وجہ سے 2 ہفتوں کے لیے اسکول اور یونیورسٹیاں بند کرنے کا اعلان کردیا۔
فلپائن کے دارالحکومت منیلا ریجن میں جزوی شٹ ڈائون جبکہ منیلا میں فلموں کی اسکریننگ، کانسرٹس، کھیلوں کے ایونٹس پر پابندی عائد کردی گئی ہے۔ڈنمارک میں کورونا سے پہلی موت واقع ہوگئی ہے۔دوسری جانب چین میں کورونا وائرس کے اثرات میں کمی واقع ہوئی ہے،جہاں گذشتہ چوبیس گھنٹوں میں تیرہ اموات اور صرف بیس کیسز رپورٹ ہوئے ہیں۔کولمبیا نے قرنطینہ کے اصول توڑنے پر چار یورپی سیاحوں کو ملک بدر کر دیا، کرونا وائرس سے لڑنے کیلئے ڈچ سائنس دانوں کو اینٹی باڈی مل گئی، انسانوں پرٹیسٹ کے لیے مزید وقت لگ سکتا ہے۔ سائنسدان میڈیسن کی تیاری کے لیے دوا ساز کمپنی کو قائل کریں گے۔
