لاہور(این این آئی) کورونا وائرس کے خطرے کے تناظر میں ناجائز منافع خوری کے خلاف لاہور پولیس نے کارروائی کرتے ہوئے مہنگے داموں فیس ماسک فروخت کرنے والے میڈیکل سٹور کے خلاف مقدمہ درج کر لیا۔ محمود فارمیسی ڈی ایچ اے بلاک ایچ پر ماسک 550 روپے میں فروخت ہو رہا تھا۔ ناجائز منافع خوری کی شکایت ملنے پر پولیس اہلکار نے بھیس بدل کر خود تصدیق کی۔ دکاندار نے فارمیسی میں ریٹ لسٹ بھی

آویزاں نہیں کر رکھی تھی۔ این 95 قسم کا ماسک زائد نرخوں پر بیچنے پر تھانہ ڈیفنس بی میں ایف آئی آر کا اندراج کر لیا گیا۔ ترجمان لاہور پولیس کے مطابق سی سی پی او ذوالفقار حمید نے شہریوں کو 15 پر شکایت کی سہولت دے رکھی ہے۔ سی سی پی او نے واضح کیا کہ کسی کو عوام کے مفادات سے نہیں کھیلنے دیں گے۔ شہری بلا جھجھک مہنگے ماسک کی شکایت پولیس کو درج کرائیں۔ فوری کارروائی کی جائے گی۔