ڈھاکہ(نیوزڈیسک) بھارت کے خلاف پہلے ون ڈے میچ کے بنگلہ دیشی ہیرو مستفیض الرحمان نے پاکستانی فاسٹ بولر محمد عامر کو اپنا آئیڈیل قرار دےدیا۔ مستفیض الرحمان کا کہنا ہے کہ انہیں سپاٹ فکسنگ سکینڈل سے فرق نہیں پڑتا، محمد عامر ان کے آئیڈیل ہیں اور رہیں گے۔ واضح رہے کہ 19 سالہ مستفیض الرحمان نے بھارت کے خلاف پہلے ون ڈے میچ میں انٹرنیشنل ڈیبیو کیا۔ انہوں نے پہلے ہی میچ میں 5 وکٹیں حاصل کرتے ہوئے میچ کے بہترین کھلاڑی کا اعزاز بھی اپنے نام کیا۔ انہیں مستقبل کا سپر سٹار قرار دیا جا رہا ہے۔بنگلہ دیشی میڈیا سے گفتگو میں مستفیض الرحمان نے کہا کہ میں محمد عامر کو اپنا آئیڈیل مانتا ہوں اور ان جیسی ہی بولنگ کرنے کی کوشش کرتا ہوں۔ خوشی ہے کہ پہلے میچ میں اچھی کارکردگی دکھائی۔ باقی میچوں میں بھی ایسی ہی کارکردگی دکھا کر بنگلہ دیش کو ون ڈے سیریز جتوانے میں اہم کردار ادا کرنا چاہتا ہوں۔