اسلام آباد(نیوزڈیسک)زرداری ہاو¿س میں افطار ڈنر پر اہم سیاسی جماعتوں کے قائدین کو مدعو کیا گیا تھا مسلم لیگ ق کے وفد نے چودھری شجاعت حسین اور ایم کیو ایم کے وفد نے فاروق ستار کی قیادت میں شرکت کی۔ میاں افتخار کی سربراہی میں اے این پی کا وفد بھی زرداری ہاو¿س پہنچا۔ مٹن چانپ، مٹن قورمہ، سندھ بریانی، فش پکوڑا، چنا چاٹ، دہی بھلوں اور شربت سے مہمانوں کی تواضع کی گئی۔ چکن شاشلک اور باربی کیو بھی مینیو کا حصہ تھے۔ سویٹ میں کھیر، گڑ والے چاول اور قلفہ پیش کیا گیا۔ لیموں پانی اور کولڈ ڈرنکس بھی دستر خوان کی زینت تھے۔ تحریک انصاف اور جماعت اسلامی دعوت کے باوجود افطار ڈنر میں شریک نہیں ہوئیں۔ جے یو آئی ف کے سربراہ مولانا فضل الرحمان نے اپنے گھر پر مہمانوں کی آمد کے سبب معذرت کر لی تاہم فرحت اللہ بابر وضاحتیں دیتے رہے کہ صرف پیپلز پارٹی کے اتحادیوں کو ہی بلایا گیا تھا۔ مسلم لیگ ن کو مدعو ہی نہیں کیا گیا تھا۔ وزیر اطلاعات پرویز رشید کے مطابق جب دعوت نہیں ملی تو جانے کا سوال ہی پیدا نہیں ہوتا۔ فوج کےحوالے سے زرداری کے بیان پر حکومت اپنا موقف واضح کر چکی ہے۔ وزیراعظم کے سیاسی مشیر آصف کرمانی نے بھی وزیراعظم ہاو¿س کو کوئی دعوت نامہ نہ ملنے کی تصدیق کی۔