لاہور(این این آئی)پنجاب یونیورسٹی میں وائس چانسلر ڈاکٹر نیاز احمد کی زیر قیادت پاک فوج سے اظہار یکجہتی کے لئے ریلی نکالی گئی۔ ریلی میں پرووائس چانسلر پروفیسر ڈاکٹر سلیم مظہر، فیکلٹیوں کے ڈینز، صدور شعبہ جات، اساتذہ اور طلبا و طالبات کی بڑی تعداد نے شرکت کی۔ ریلی میں شرکا نے پاک فوج کی قربانیوں کو خراج تحسین پیش کرنے کے لئے بینرز اٹھا رکھے تھے۔
ریلی سے خطاب کرتے ہوئے وائس چانسلر ڈاکٹر نیاز احمد نے کہا کہ پاک فوج کی قربانیوں کے باعث آج عوام اور پاکستان کے تمام شعبے آزادی کی سانس لے رہے ہیں۔ انہوں نے کہا کہ پاک آرمی دنیا کی نمبر ون آرمی ہے جس نے ملک کی سرحدوں کی حفاظت کے ساتھ دہشت گردی کے خلاف جنگ میں قربانیاں دے کر ملک میں امن بھی قائم کیاہے۔ انہوں نے کہا کہ پاکستان کو کمزور کرنے کے لئے سازشیں کی جا رہی ہیں۔ انہوں نے کہا کہ اداروں کا مورال گرانے کے لئے مختلف عناصر پروپیگنڈہ کر رہے ہیں اور پنجاب یونیورسٹی اس ریلی کے ذریعے پروپیگنڈہ کرنے والے ان عناصر کو پیغام دینا چاہتی ہے کہ عوام پاک فوج کے شانہ بشانہ کھڑی ہے اور وطن کے لئے ان کی قربانیوں کو خراج تحسین پیش کرتی ہے۔ انہوں نے کہا کہ مودی کے حالیہ مسلم کش اقدامات سے ایک مرتبہ پھر ثابت ہو گیاہے کہ قائد اعظم اور علامہ اقبال پاکستان کے قیام کے لئے کس قدر درست اور واضح تھے۔ انہوں نے کہا کہ بھارت میں پاکستان کے برابر مسلمان رہتے ہیں تاہم آج ان سے شہریت کا حق چھینا گیا ہے۔ انہوں نے کہا کہ بھارت اور مقبوضہ کشمیر میں اقلیتوں پرجو ظلم ہو رہا ہے اس پر اقوام متحدہ کو اپنا کردار ادا کرنا چاہیے۔ انہوں نے کہا کہ پاک فوج کے جوانوں کی قربانیاں ہیں جس کی وجہ سے آج ہماری زندگی کے تمام طبقا ت آزادہیں۔ انہوں نے کہا کہ پنجاب یونیورسٹی نے قومی اور بین الاقوامی معاملات میں قوم کی رہنمائی کی ہے اور آج بھی ہم یہی پیغام دینا چاہتے ہیں کہ پاکستانی عوام اور ادارے متحد ہیں۔
