مریدکے (این این آئی) مسلم لیگ (ن) کے مرکزی رہنما رانا تنویر حسین نے کہا ہے کہ پی ٹی آئی حکومت کی خارجہ پالیسی ناکام ہوچکی ہے،کشمیر سمیت کسی بھی معاملہ پر دنیا ہمارا ساتھ دینے کو تیار نہیں۔مریدکے میں ایم این اے اظہر قیوم ناہرا کے ہمراہ میڈیا سے خصوصی گفتگو کرتے ہوئے رانا تنویر نے کہا

ہماری خارجہ پالیسی کی وجہ سے یو اے ای اور سعودی عرب کچھ ایشوز پر نالاں ہیں ان ایشوز کی وضاحت کیلئے عمران خان یو اے ای اور سعودی عرب گئے۔کشمیر سمیت کسی بھی معاملہ پر دنیا ہمارا ساتھ دینے کو تیار نہیں۔ایک سوال کے جواب میں انہوں نے کہا آرمی چیف کے سلسلہ میں حکومتی ڈرافٹ ایک دو دن میں آنے والا ہے حکومتی ڈرافٹ ملے گا تو مسلم لیگ (ن) پارٹی اجلاس میں آفس وقار کے مطابق فیصلہ کرے گی۔انہوں نے کہا حکومت بلدیاتی الیکشن نہیں کروا پائے گی کیونکہ لوکل گورنمنٹ قانون کے متعلق الیکشن کمشن بھی کہہ چکا ہے کہ لوکل گورنمنٹ قانون میں بہت نقائص پر مشتمل ہے اس کے مطابق الیکشن نہیں کرواسکتے ویسے بھی حکومت سرائکی صوبہ بنانے سے اکثریت نہ ہونے کے بہانے سے انکاری ہے۔انہوں نے کہا حکومت نے اکانومی تباہ کردی لا اینڈ آرڈر کی صورتحال کا اندازہ اس بات سے لگایا جاسکتا ہے کہ پی آئی سی جیسا واقعہ دنیا کی تاریخ میں نہیں ہوا حکومت کہتی ہے اس کے خلاف سازشیں کی جارہی ہیں کوئی سازش نہیں کررہا حکومت کو خطرہ اندر سے ہے اپنے بوجھ سے خود گر جائے گی۔انہوں نے کہا کہ مولانا فضل الرحمن کی قیادت میں حکومت کیخلاف احتجاج جاری ہے اور اپوزیشن جماعتیں انکے ساتھ ہیں۔