اسلام آباد (آن لائن) وزیر خارجہ شاہ محمود قریشی نے سعودی عرب کے مختصر دورے کے دوران سعودی ہم منصب فیصل بن فرحان بن عبداللہ کے ساتھ ملاقات کے دوران دوطرفہ تعلقات، مقبوضہ کشمیر کی حالیہ صورتحال اور اہم علاقائی وبین الاقوامی امورپر تبادلہ خیال کیا۔وزارت خارجہ کے مطابق وزیر خارجہ شاہ محمود قریشی جب سعودی وزارت خارجہ پہنچے تو سینئر سعودی حکام نے وزیر خارجہ کا استقبال کیا۔

اس کے بعد وزیر خارجہ شاہ محمود قریشی کی سعودی عرب کے وزیر خارجہ فیصل بن فرحان بن عبداللہ سے ملاقات کی۔ ملاقات کے دوران دونوں راہنماؤں نے دونوں ممالک کے مابین دو طرفہ تعلقات،مقبوضہ جموں و کشمیر کی صورتحال اور اہم علاقائی و بین الاقوامی امور پر تبادلہ خیال کیا گیا۔ شاہ محمود قریشی نے سعودی ہم منصب کو مقبوضہ جموں و کشمیر کی تازہ ترین صورتحال سے آگاہ کرتے ہوئے کہا کہ بھارت نے گذشتہ چار ماہ سے 80 لاکھ نہتے کشمیریوں کا مکمل محاصرہ کیے ہوئے ہے۔بھارت نے دنیا کو اصل حقائق سے بے خبر رکھنے کیلئے ذرائع مواصلات پر مکمل پابندی عائد کر رکھی ہے بنیادی انسانی حقوق معطل ہیں۔مقبوضہ جموں و کشمیر کے مظلوم، بھارتی ظلم و ستم سے نجات حاصل کرنے کے لیے عالمی برادری، بالخصوص مسلم امہ کی طرف دیکھ رہے ہیں۔دونوں وزرائے خارجہ نے کثیرالجہتی شعبہ جات میں دو طرفہ تعاون کے فروغ اور خطے میں امن و استحکام کیلئے باہمی مشاورت جاری رکھنے پر اتفاق کیا۔وزیر خارجہ شاہ محمود قریشی نے سعودی عرب کی وزارت خارجہ میں “وزٹر بک” میں اپنے تاثرات بھی قلمبند کئے۔ سعودی وزیر خارجہ فیصل بن فرحان نے پاکستان کے ساتھ مکمل تعاون کی یقین دہانی کروانی اور خطے میں امن وامان کے حوالے سے پاکستان کی کوششوں کی تعریف کی۔