کہتے ہیں حسن ایسا ہونا چاہیے کہ سوتن بھی اس کی تعریف پر مجبور ہو جائے اور بہادری ایسی ہونی چاہیے کہ دشمن بھی آپ کو زندہ باد کہہ اٹھے‘ ہمیں عمران خان کی گورننس ان کے سیاسی فیصلوں سے لاکھ اختلاف ہو سکتا ہے لیکن جہاں تک سلامتی کونسل میں ان کی تقریر کی بات ہے تو ہمیں ماننا پڑے گا وزیراعظم نے واقعی کمال کر دیا‘
یہ تقریر ہمیشہ یو این کی یادگار تقریروں میں شامل رہے گی‘ قوم 72 سال سے اپنے لیڈروں سے ایسی بہادری‘ ایسی جرأت،ایسی مدلل گفتگو اور ایسی واضح پالیسی کی توقع کرتی آ رہی تھی‘ یہ اعزاز بہرحال عمران خان کو حاصل ہوا اور یہ ورلڈ کپ کی طرح ہمیشہ ان کے پاس رہے گا‘ یہ تقریر ہمیشہ ورلڈ کپ پلس کی حیثیت سے تاریخ میں زندہ رہے گی‘ وزیراعظم عمران خان میری طرف سے مبارک باد قبول کریں، وزیراعظم کی تقریر کا عملی نتیجہ کیا نکلے گا اور کب نکلے گا؟ کیا اس تقریر سے مقبوضہ کشمیر سے کرفیو ہٹ جائے گا اور انڈیا عالمی مبصرین کو کشمیر جانے کی اجازت دے دے گا، مولانا فضل الرحمن کا آزادی مارچ فائنل شکل اختیار کرتا جا رہا ہے‘ آج بلاول بھٹو نے کہا کہ مولانا فضل الرحمان کو اخلاقی سپورٹ دی ہے اگر کوئی درمیانی راستہ نکل آتا ہے تو مولانا کی مزید سپورٹ کریں گے اور احسن اقبال نے اس مارچ کو نومبر تک موخر کرنے کا مشورہ دیدیا، بلاول بھٹو کس درمیانی راستے کی بات کر رہے ہیں، حکومت نے وزراء کو ہٹانے اور ان کے قلم دان تبدیل کرنے کا فیصلہ کرلیا، کیا ہر چھ ماہ بعد وزراء کی تبدیلی سے ملک تبدیل ہو جائے گا؟