کولمبو(این این آئی) ایشیا کرکٹ کپ انڈر 19میں پاکستان اور بھارت کے درمیان میچ (کل)سات ستمبر کو کھیلا جائیگا ۔ تفصیلات کے مطابق گزشتہ روز ایشیا کرکٹ کپ (اے سی سی) انڈر 19 ایشیا کپ 2019 کے ٹرافی کی تقریب رونمائی ہوئی تھی جس میں آٹھوں ٹیموں کے کپتان شریک تھے۔تقریب کے دوران کپتانوں کے ساتھ ایک پریس کانفرنس بھی کی گئی جس کے بعد کھلاڑیوں کا ٹرافی کے ساتھ فوٹو سیشن ہوا۔ پاکستانی کپتان روحیل نزیر نے بھی ٹرافی کے ساتھ تصویر بنوائی۔اے سی سی انڈر 19 کپ میں روایتی حریف
پاکستان اور بھارت گروپ اے میں شامل ہیں جبکہ افغانستان اور کویت کی ٹیمیں بھی گروپ اے کا حصہ ہوں گی۔گروپ بی میں سری لنکا، بنگلہ دیش، متحدہ عرب امارات (یو اے ای) اور نیپال شامل ہیں۔روایتی حریف پاکستان اور بھارت کے درمیان 7 ستمبر کو میچ کھیلا جائے گا جبکہ پاکستان اپنا پہلا میچ افغانستان کے خلاف 5 ستمبر کو کھیلے گا۔ پاکستان اور کویت کی ٹیمیں 9 ستمبر کو آمنے سامنے ہوں گی۔اے سی سی انڈر 19 کپ 5 سے 14 ستمبر تک سری لنکا میں شیڈول ہے اور ٹورنامنٹ کا فائنل 14 ستمبر کو کھیلا جائے گا۔
