نئی دلی(آن لائن) مقبوضہ کشمیر میں بھارتی حکومت کے مظالم پر نوجوان بیورو کریٹ کنن گوپی ناتھ نے احتجاجاً استعفیٰ دے دیا۔بھارتی میڈیا کے مطابق سابق بھارتی بیورو کریٹ کنن گوپی ناتھ نے بھارتی حکومت کے کشمیر میں ڈھائے جانے والے مظالم کو بے نقاب کرتے ہوئے کہا ہے کہ بھارت مقبوضہ کشمیر میں جو کر رہا ہے اس کامقصد انسانی جانوں کاتحفظ نہیں۔

کشمیریوں سے حق رائے آزادی چھینا جا رہا ہے۔سابق بھارتی بیورو کریٹ نے کہا کہ جمہوریت میں ہم کسی بھی شہری کے حقوق غصب نہیں کرسکتے۔ کنن گوپی ناتھ نے خبر رساں ادارے کو انٹرویو کے دوران اپنے استعفیٰ دینے سے متعلق بتاتے ہوئے کہا تھا کہ جموں کشمیر میں بنیادی حقوق کی دھجیاں اڑتے دیکھ کر انہوں نے اپنے استعفے کے کاغذات جمع کرائے۔انہوں نے مزید کہا جب دنیا کی ایک بڑی جمہوریت پوری ریاست پر پابندیوں کا اعلان کرتی ہے اور لوگوں کے بنیادی حقوق کی خلاف ورزی کرتی ہے تو کم از کم وہ یہ جواب دے سکتے ہیں کہ انہوں نے ملازمت ہی چھوڑ دی۔کنن کا کہنا ہے کہ وہ سول سروس میں اس امید پر شامل ہوئے تھے کہ وہ ان لوگوں کی آواز بنیں گے جو خاموش ہیں لیکن یہاں وہ اپنی آواز بھی کھو بیٹھے۔کنن گوپی ناتھ نے ٹوئٹ کرتے ہوئے کہا تھا میں نے ایک بار سوچاتھا کہ سول خدمات میں شامل ہونے کا مطلب شہریوں کے حقوق اور آزادی کو بڑھانے کا ایک موقع ہے۔کنن گوپی ناتھ دوسرے آئی اے ایس آفیسر ہیں جنہوں نے کشمیر میں ہونے والی خلاف ورزیوں کے باعث استعفیٰ دیا ان سے قبل آئی اے ایس آفیسر شاہ فیصل بھی استعفیٰ دے چکے ہیں۔