اسلام آباد (نیوز ڈیسک) مقبوضہ کشمیر کی صورتحال پر اقوام متحدہ کی سلامتی کونسل کا اہم ترین اجلاس اس وقت نیو یارک میں جاری ہے، سلامتی کونسل کے اجلاس سے قبل وزیراعظم عمران خان اور امریکہ کے صدر ڈونلڈ ٹرمپ کے درمیان ٹیلی فونک رابطہ ہوا، دونوں رہنماؤں میں بیس منٹ تک گفتگو ہوئی، اس دوران کشمیر کی موجودہ صورتحال پر دونوں رہنماؤں میں تفصیلی گفتگو ہوئی،
واضح رہے کہ وزیر خارجہ شاہ محمود قریشی نے دونوں رہنماؤں کے درمیان ہونے والی اہم گفتگو سے میڈیا کو آگاہ کرتے ہوئے بتایا کہ امریکی صدر ڈونلڈ ٹرمپ اور وزیراعظم پاکستان عمران خان کے درمیان مسئلہ کشمیر، افغانستان اور خطے کی صورت حال سمیت اہم امور پر تفصیلی گفتگو ہوئی۔ انہوں نے کہا کہ دونوں رہنماؤں کے درمیان اچھی گفتگو رہی۔ اس موقع پر وزیراعظم عمران خان نے امریکی صدر ٹرمپ کو مقبوضہ کشمیر کی صورتحال سے آگاہ کیا اور انھیں اپنا نقطہ نظر پیش کیا۔ دونوں رہنماؤں نے مستقبل میں بھی رابطے میں رہنے کا فیصلہ کیا۔ اس موقع پر وزیر خارجہ شاہ محمود قریشی نے بتایا کہ وزیراعظم عمران خان دنیا کے رہنماؤں سے رابطے کر رہے ہیں۔واضح رہے کہ وزیر خارجہ شاہ محمودقریشی نے اسلامی ممالک کی تنظیم (اوآئی سی)کی جانب سے مقبوضہ کشمیر سے فی الفور کرفیو اٹھانے کے مطالبہ کا بڑی سفارتی کامیابی قراردیا ہے۔دفترخارجہ کی جانب سے جاری کردہ بیان میں کہا گیا ہے کہ او آئی سی کی جانب سے بھارت سے مقبوضہ جموں وکشمیر پر فی الفور کرفیوں ختم کرنے کامطالبہ کیا گیا ہے۔تاکہ وہاں مسلسل کرفیو کی وجہ سے جو ادویات کی کمی ہو چکی ہے اور مریضوں کو ہسپتال پہنچانے میں دقت پیش آ رہی ہے ان تکالیف کا ازالہ ہو سکے۔ وزیر خارجہ شاہ محمود قریشی کا کہنا تھا کہ آج یہ آواز صرف پاکستان کی نہیں پوری اسلامی دنیا کی متفقہ آواز بن چکی ہے مجھے امید ہے کہ سیکورٹی کونسل بھی اس اسلامی دنیا کی آواز پر توجہ دے گی۔واضع رہے کہ گزشتہ دنوں شاہ محمودقریشی نے جدہ میں ہونیوالے اجلاس میں شرکت کی تھی۔
