فراہ ( آن لائن )افغانستان کے مغربی صوبے فراہ میں سے گزرنے والی قندھار ہرات ہائی وے پر نصب ایک بم کے پھٹنے کے نتیجے میں ایک بس میں سوار چونتیس مسافروں کی ہلاکت ہو گئی ہے۔ ان میں خواتین اور بچے بھی شامل ہیں۔ فراہ صوبے کی حکومت کے ترجمان کے مطابق دس زخمی مسافروں میں سے بعض کی حالت تشویش
ناک ہے اور ہلاکتوں میں اضافہ ہو سکتا ہے۔ سڑک کے کنارے بم نصب کرنے کی ذمہ داری کسی عسکری گروپ نے ابھی تک قبول نہیں کی ہے۔ یہ دھماکا اقوام متحدہ کی اس رپورٹ کے ایک روز بعد ہوا ہے، جس میں کہا گیا تھا کہ سن 2019 کے پہلے حصے میں شہریوں کی ہلاکتوں میں غیر معمولی اضافہ ہوا ہے اور یہ تعداد تیرہ سو سے زائد ہو چکی ہے۔
