ممبئی(نیوز ڈیسک)بالی ووڈ اداکارہ ودیا بالن نے کہا ہے کہ 10جون کو فلم انڈسٹری میں 10سال پورے کر رہی ہوں۔فلم انڈسٹری میں میرا سفر بہت اچھا رہا، جتنے کی امید تھی اس سے کہیں زیادہ پایا۔میڈیا سے خصوصی بات چیت کرتے ہوئے انہوں نے مزید کہا کہ اچھے لوگوں کے ساتھ کام کرنے کے کئی مواقع ہاتھ آئے۔میں بالی ووڈ میں صرف ایک فلم کرنا چاہتی تھی اور فلم پرینیتا کے ساتھ بہت خوش تھی لیکن اب دس سال اور 18فلموں کے بعد مزید فلمیں کرنے کی بھوک پہلے سے بہت بڑھ گئی ہے۔ میں بہت بھوکی اداکارہ ہوں، جب مجھے کوئی اچھا موقع ملے تو میں اس پر ٹوٹ پڑتی ہوں۔ میں نے کبھی نہیں سوچا کہ یہ ہیروئن کا کردار ہے یا کریکٹر رول۔میں کسی فلمی خاندان سے نہیں ہوں اسلئے میرے خاندان کے لوگوں میں ایک قسم کا خوف تھا،تاہم آج میرا خاندان مجھ پر فخر کرتا ہے۔ میری ماں میرے ساتھ ٹی وی سیریلز کے سیٹ پر آیا کرتی تھیں۔ لیکن جب میری ماں کو یہ احساس ہوا کہ دنیا اور ماحول کیسا بھی ہو اس سے فرق نہیں پڑتابس خود پر اعتماد اور اپنے کام سے لگن ضروری ہے۔انہوں نے ساتھ آناچھوڑدیا۔