اسلام آباد (این این آئی) قومی اسمبلی کی قائمہ کمیٹی توانائی کو سیکرٹری پٹرولیم نے بتایا ہے کہ ایران نے گیس پائپ لائن مکمل نہ کر نے پر پاکستان کو نوٹس دیا ہے، جواب دینے کیلئے مشاورت جاری ہے،ٹاپی پائپ لائن منصوبے کا سنگ بنیاد اس سال اکتوبر میں رکھ دیں گے۔قومی اسمبلی کی قائمہ کمیٹی توانائی کا اجلاس عمران خٹک کی زیر صدارت ہوا جس میں سیکرٹری پٹرولیم میاں اسد حیاء الدین نے کہاکہ ملک میں مقامی گیس پیداوار کم ہو رہی ہے،ہمیں درآمدی ایل این جی پر زیادہ

انحصار کر نا پڑتا ہے۔ انہوں نے کہاکہ گیس کی مقامی پیداوار بڑھانے کیلئے بلوچستان اور کے پی کے امن و امان کے مشکل علاقوں میں نئی گیس پیداوار پر زیادہ ریٹس دینگے۔ انہوں نے کہاکہ ہم نے اس سلسلے میں سمری مشترکہ مفادات کو بھیجی ہے، دسمبر تک ملک میں تیل اور گیس کی تلاش کیلئے 20نئے بلاکس کیلئے بولی کرائیں گے۔انہوں نے کہاکہ ملک میں 3 سے 6 ارب مکعب فٹ یومیہ گیس کی قلت ہے،قبائلی علاقوں اور بلوچستان پر مشتمل فرنٹئیر زون کے قیام کی تجویز دی ہے۔ انہوں نے کہاکہ پانچ بلاکس کی نیلامی کی ہے دسمبر تک 20 نئے بلاکس کی نیلامی کریں گے۔ انہوں نے کہاکہ ایک جامع پٹرولیم پالیسی بنانے کی کوشش کر رہے ہیں۔ انہوں نے کہاکہ گیس کی پیداوار کمی کا شکار ہے،ملک میں کام کرنے کیلئے اس وقت ڈائریکٹوریٹ آف پٹرولیم کنسیشنز سے 23 مختلف منظوریاں درکار ہیں۔ انہوں نے کہاکہ ان مراحل کو دسمبر تک کم کرنے کی کوشش کر رہے ہیں،ملک میں اب زیادہ بڑے گیس ذخائر ملنے کے امکانات نہیں۔ انہوں نے کہاکہ ملک سے زیادہ تر ملٹی نیشنل کمپنیاں جا چکی ہیں۔انہوں نے کہاکہ بلوچستان کے بلاک 28 میں گیس کے بڑے ذخائر ملنے کے امکانات ہیں انہوں نے کہاکہ بلاک 28 سے سوئی ذخائر سے دگنا ذخائر ملنے کی امید ہے،حتمی بات اس وقت ہی کہی جا سکے گی جب اسکی سسمک سٹڈی ہو گی۔ انہوں نے کہاکہ ایل این جی ایک مختصر مدت کیلئے حل ہے،1 ارب مکعب فٹ گیس یومیہ آئل این جی سے مل رہی ہے۔سیکریٹری پٹرولیم نے کہاکہ

ملک کی طلب 4 سے 6 ارب مکعب فٹ گیس یومیہ ہے،سٹریڑز آف ہرمز اگر بند ہوئی تو ایل این جی کی درآمد بند ہو جائیگی۔انہوں نے کہاکہ گزشتہ دس سالوں میں ملک میں تیل و گیس کی تلاش کا کام سست روی کا شکار رہا،سوئی کمپنیوں کو گیس چوری روکنے کیلئے اقدامات کی ہدایت کی ہے۔سیکریٹری پٹرولیم نے کہاکہ ایران نے اپران پاکستان گیس پائپ لائن مکمل نہ کرنے پر پاکستان کو نوٹس دیا ہے،پاکستان کا موقف ہے کہ پائپ لائن مکمل کرنا ہمارے لیے ممکن نہیں،ایران کو جواب دینے

کیلئے اٹارنی جنرل سے بھی مشاورت کر رہے ہیں۔کمیٹی کے رکن نے سوال کیا کہ کیا کوئی پائپ لائن ہماری زندگی میں مکمل ہو جائے گی۔ سیکرٹری پٹرولیم نے کہاکہ امید ہے یہ منصوبے جلد مکمل ہوں گے۔ سیکرٹری پٹرولیم نے کہاکہ ٹاپی پائپ لائن منصوبے کا سنگ بنیاد اس سال اکتوبر میں رکھ دیں گے۔ رکن کمیٹی نے مطالبہ کیا کہ صوبوں کو تیل و گیس والے اضلاع کو رائلٹی منتقل کرنے کیلئے قانون سازی کی جائے۔ ڈی جی گیس وزارت پٹرولیم نے کہاکہ ممبران پارلیمنٹ کی اسکیم پر اعتراض نہیں کیا،کابینہ ڈویژن کا موقف تھا کہ وہ فنڈز کے استعمال کی اجازت نہیں دے سکتی۔سیکرٹری پٹرولیم نے کہاکہ کام رکوانے میں بیوروکریسی کا کردار نہیں،مختلف وزارتوں کے درمیان معاملہ حل نہ ہونے کے باعث التوا ہوا۔