اسلام آباد(آن لائن) چیئر مین پی اے سی کے معاملے پر پیپلزپارٹی رہنماؤں کے متضاد بیانات، شازیہ مری کا فیصلے پر تحفظات کا اظہار اور اعتماد میں نہ لینے کا شکوہ جبکہ خورشید شاہ نے دعویٰ کیا ہے کہ شہباز شریف کو ہٹانے کا مطالبہ پیپلزپارٹی کا تھا۔
میڈیا رپورٹس کے مطابق مسلم لیگ ن اور پیپلزپارٹی کے درمیان ایک طرف تو چیئر مین پبلک اکاؤنٹس کمیٹی کے معاملے پر اختلافات سامنے آ گئے ہیں جبکہ دوسری طرف پیپلزپارٹی رہنماؤں کے متضاد بیانات کچھ اور ہی کہانی سنارہے ہیں پیپلزپارٹی کی رہنما شازیہ مری نے کہا ہے کہ مسلم لیگ ن کا چیئر مین پی اے سی کی تبدیلی کا فیصلہ تکطرفہ ہے پیپلزپارٹی کو اعتماد میں لئے بغیر رانا تنویر حسین کو نیا چیئر مین نامزد کیا گیا۔بلاول بھٹو زرداری پارلیمنٹ میں موجود تھے لیکن انہیں پیغام بھیج کر کسی نے پوچھا گوارہ نہیں کیا۔ مسلم لیگ ن کے یکطرفہ فیصلے سے حیران ہیں فیصلے سے متعلق پی اے سی ارکان کو بھی آگاہ نہیں کیا گیا۔ انہوں نے شکوہ کیا کہ شہباز شریف کو چیئر مین پبلک اکاؤنٹس کمیٹی بنانے میں ہر قسم کا تعاون کیا تھا۔ پیپلزپارٹی نے مسلم لیگ ن کو تحفظات سے آگاہ کر دیا ہے لیکن اس کے بر عکس پیپلزپارٹی کے رہنما خورشید شاہ نے نجی ٹی وی سے گفتگو کرتے ہوئے دعویٰ کیا ہے کہ شہباز شریف کو چیئر مین پی اے سی کے عہدے سے ہٹانے کا مطالبہ پیپلزپارٹی کا ہے۔
