اسلام آباد (این این آئی) پاکستان نے کہا ہے کہ پاکستان، دیرپا تعمیر و ترقی کے ایجنڈے پر گامزن ہے، افغانستان میں امن و استحکام پاکستان سمیت پورے خطے کے بہترین مفاد میں ہے، پاکستان افغانستان میں سیاسی مصالحت کیلئے نیک نیتی سے اپنا تعاون جاری رکھے گا جبکہ امریکہ نے افغانستان میں قیام امن کیلئے
پاکستان کی کوششوں کی تعریف کی ہے ۔جمعہ کو امریکی نمائندہ خصوصی برائے افغان مفاہمتی عمل ایمبیسڈر زلمے خلیل زاد وفد کے ہمراہ وزارتِ خارجہ پہنچے تو سیکرٹری خارجہ محترمہ تہمینہ جنجوعہ نے ان کا خیر مقدم کیا۔بعد ازاں دونوں ممالک کے درمیان وفود کی سطح پر مذاکرات ہوئے ۔امریکی وفد کی قیادت امریکی نمائندہ خصوصی برائے افغان مفاہمتی عمل ایمبیسڈر زلمے خلیل زاد جبکہ پاکستانی وفد کی قیادت سیکرٹری خارجہ محترمہ تہمینہ جنجوعہ کر رہی تھیں ۔ مذاکرات میں افغان مفاہمتی عمل میں ہونیوالی پیش رفت سمیت، اہم امور پر تبادلہ خیال کیا گیا ۔ ذرائع کے مطابق امریکی نمائندہ خصوصی نے افغانستان میں امن کے قیام کیلئے پاکستانیوں کی کوششوں کی تعریف کی ۔ بعد ازاں امریکی نمائندہ خصوصی برائے افغان مفاہمتی عمل ایمبیسڈر زلمے خلیل زاد نے وزارتِ خارجہ میں وزیر خارجہ مخدوم شاہ محمود قریشی سے ملاقات کی جس میں افغان مفاہمتی عمل میں ہونیوالی پیش رفت سمیت، باہمی دلچسپی کے اہم دوطرفہ امور پر تبادلہ خیال کیا گیا ۔ایمبیسڈر زلمے خلیل زاد نے وزیر خارجہ کو دوحہ مذاکرات میں ہونے والی پیش رفت اور افغان امن عمل کے سلسلے میں اپنی حالیہ مصروفیات کی تفصیلات سے آگاہ کیا ااور افغانستان میں اپنی اہم ملاقاتوں کا احوال گوش گزار کیا۔وزیر خارجہ مخدوم شاہ محمود قریشی نے انٹرا افغان مذاکرات کے حوالے سے، پیش رفت کو سراہا ۔ وزیر خارجہ نے کہاکہ افغانیوں کے مابین مذاکرات کا انعقاد افغان مفاہمتی عمل کا اہم جزو ہے ۔مخدوم شاہ محمود قریشی نے کہاکہ پاکستان افغانستان میں سیاسی مصالحت کیلئے نیک نیتی سے اپنا تعاون جاری رکھے گا۔انہوںنے کہاکہ پاکستان، دیرپا تعمیر و ترقی کے ایجنڈے پر گامزن ہے – افغانستان میں امن و استحکام پاکستان سمیت پورے خطے کے بہترین مفاد میں ہے-
