لاہور(سی پی پی)پاکستان مسلم لیگ(ن ) کی ترجمان اور سابق وزیرمملکت برائے اطلاعات و نشریات مریم اورنگزیب نے حکومت کے سمندری ذخائر سے تیل کے منصوبے کے بیان پر طنز کرتے ہوئے کہا ہے کہ سمندر سے تیل نکلنے کا پتا نہیں، مگر حکومت نے عوام کا تیل نکال دیا۔ وزیراعظم عمران خان نے پچھلے پانچ سال کنٹینر پر نواز اور شہباز شریف پر سیاست کی اور اب پچھلے آٹھ ماہ سے دونوں کے
نام پر حکومت کر رہے ہیں۔لاہور میں پریس کانفرنس کرتے ہوئے انھوں نے کہا کہ ہیلتھ کارڈ ہو یا موٹر وے کا افتتاح، میٹروبس ہو یا ائیرپورٹ کا فیتہ، بجلی پیدا کرنے کا معاملہ ہو یا سمندری ذخائر سے تیل کے منصوبے، ان پر صرف ن لیگی قیادت کی مہر ہے۔انہوں نے طنزیہ لہجے میں کہا کہ اللہ کرے سمندری ذخائر سے تیل نکل آئے لیکن موجودہ حکومت غریب عوام کا تیل نکال رہی ہے، وزیر اعظم اس پر غور کریں۔
