لاہور ( این این آئی ) پنجاب فوڈ اتھارٹی نے چھٹی کے روز بھی موٹر وے پر فوڈ پوائنٹس کی چیکنگ کی ، ڈی جی فوڈ اتھارٹی کی سربراہی میں سروس ایریاز کا معائنہ، 3 ریسٹورنٹس سیل، ایک کو جرمانہ کیا گیا ۔ڈی جی فوڈ اتھارٹی محمد عثمان نے بتایا کہ فرائی چکس فاسٹ فوڈ ریسٹورنٹ ناقص گوشت، حشرات کی موجودگی پر سیل کیا گیا ،معروف فاسٹ فوڈ ریسٹورنٹ میں گوشت کو سٹور کرنے کا ناقص انتظام پایا گیا۔ معروف چکن بروسٹ ریسٹورنٹ

کو زائد المعیاد کوکنگ آئل کی موجودگی پر سیل کیا گیا، سکھیکی سروس ایریا پر میزاب ہوٹل بھی سابقہ نوٹس پر عمل نہ کرنے پر سیل کیا گیا جبکہ پام ان ریسٹورنٹ کو استعمال شدہ تیل کی تلفی کا ریکارڈ نہ رکھنے پر 25 ہزار جرمانہ کیا گیا۔کیپٹن (ر) محمد عثمان نے کہا کہ وزیر اعلی پنجاب کی ہدایت پر موٹر وے سروس ایریا کی چیکنگ میں اضافہ کر دیا گیا ہے، وزیر اعلی پنجاب کی ہدایت کے مطابق تمام موٹر وے سروس ایریاز کی ہفتہ وار چیکنگ ہو گی۔