کراچی(این این آئی)فیڈرل بورڈآف ریونیو(ایف بی آر) نے بے نامی جائیداد کی اطلاع فراہم کرنے پر انعامات کااعلان کیاہے جبکہ کمشنر ان لینڈ ریونیو کو بے نامی جائیدادوں کے خلاف کارروائی کا اختیار بھی دے دیا، بے نامی ٹرانزیکشنز کی ممانعت سے متعلق ایکٹ کے تحت ملک بھر میں عدالتیں بھی قائم کی جائیں گی۔

ایف بی آر بھی کرپشن کی روک تھام کے لیے سرگرم ہو گئی اور بے نامی جائیدادوں کی اطلاع دینے والوں کیلیے انعام کا اعلان کر دیا ۔ بے نامی ایکٹ کے رول 20 اور 21 جاری کردیئے۔ایف بی آر کے مطابق 20لاکھ مالیت تک کی جائیداد کی اطلاع فراہم کرنے والے کو 1لاکھ روپے انعام دیا جائے گا ،20لاکھ سے زائد مالیت کی جائیداد پکڑوانے والے کو 1 لاکھ 20 ہزار سے 2لاکھ 20 ہزار روپے تک انعام ملے گا۔50لاکھ یا اس سے زائد مالیت کی جائیداد بے نقاب کرنے والوں کو پہلے 50 لاکھ روپے پر 2 لاکھ20 ہزار روپے اور 50لاکھ سے زائد رقم پر3فیصدانعام میں دیا جائے گا۔ایف بی آر نے بے نامی جائیدادوں کے خلاف کارروائی کے لیے کمشنر ان لینڈ ریونیو کو اختیارات بھی دے دیئے ہیں جب کہ ڈپٹی کمشنر ان لینڈ ریونیو بے نامی جائیدادوں کو ضبط کرنے کے مجاز ہوں گے۔ان تمام جائیدادوں کو بے نامی رولز کے مطابق عبوری مدت کے لیے بحق سرکار ضبط کیا جائے گا۔بے نامی ٹرانزیکشنز کی ممانعت سے متعلق ایکٹ کے تحت ملک بھر میں متعلقہ عدالتیں بھی قائم کی جائیں گی،چیئرمین کو ماہانہ 3 لاکھ روپے تنخواہ اور مراعات فراہم کی جائیں گی ،جب کہ ایڈجو ڈیکشن اتھارٹی کے ممبران کو 2لاکھ روپے تنخواہ اور مراعات دی جائیں گی۔