لاہور(این این آئی)پنجاب اسمبلی میں قائد حزب اختلاف حمزہ شہبازنے کہا ہے کہ سابق وزیراعظم محمد نوازشریف کی صحت سے متعلق علامات اچھی نہیں، حکومت خدانخواستہ حادثے کا انتظار کرنے کے بجائے قانون کے تحت فوری اپنا فرض پورا کرے۔ کوٹ لکھپت جیل میں سابق وزیراعظم اور اپنے تایا کی عیادت کے بعد انہوں نے بتایا کہ محمد نوازشریف سے اہلخانہ نے بہت اصرار کیا ہے لیکن ان کا کہنا ہے کہ وہ اپنا معاملہ اللہ کی ذات کے سپرد کرچکے ہیں۔ عزت ووقار سے بڑھ کر کچھ اہم نہیں۔ انہوں نے کہاکہ محمد نوازشریف نے عوام، پارٹی کارکنان سےدعا کی
درخواست کی ہے۔ پنجاب اسمبلی میں قائد حزب اختلاف نے کہاکہ اگر حکومت نے فیصلہ ماننا ہی نہیں تھا تو پھر پانچ میڈیکل بورڈز بنانے کا ڈرامہ کیوں رچایا گیا؟ اور اگر میڈیکل بورڈز تشکیل دئیے گئے تو پھر ان کی سفارشات پر عمل کرنا قانونی تقاضا ہے۔ علاج کی راہ میں رکاوٹ زندگی کے قانونی حق سے انکار کا مجرمانہ اقدام ہے۔ نوازشریف کے صبر کا امتحان لینے والوں کو یہ مہنگا پڑسکتا ہے۔ حمزہ شہباز نے کہاکہ حکومت فراست کی راہ اپنائے اور علاج معالجے کو سیاسی تماشا اور انا کا مسئلہ نہ بنائے۔ ورنہ ہمیں بھی راست اقدام اٹھانا پڑے گا۔
