لاہور (ا ین این آئی)سابق وزیر اعظم و مسلم لیگ (ن) کے قائد محمد نواز شریف سے کوٹ لکھپت جیل میں قومی اسمبلی میں قائد حزب اختلاف و (ن) لیگ کے صدر محمد شہباز شریف نے ملاقات کر کے موجودہ ملکی صورتحال سمیت اہم امور پر تبادلہ خیال کیا ،
پنجاب اسمبلی میں قائد حزب اختلاف حمزہ شہباز نے کیمپ جیل میں قید خواجہ برادران سمیت دیگر پارٹی رہنماؤں سے ملاقاتیں کی ۔تفصیلات کے مطابق شہباز شریف نے جیل میں سابق وزیر اعظم و مسلم لیگ (ن) کے قائد محمد نواز شریف سے ملاقات کر کے انکی خیریت دریافت کی اور صحت یابی کیلئے بھی دعا کی ۔ انہوں نے نواز شریف کو موجودہ ملکی صورتحال سے متعلق آگاہ کیا ۔ دونوں رہنماؤں کے درمیاں ملکی سیاسی صورتحال سمیت اہم امور اور قانونی معاملات پر بھی تبادلہ خیال ہوا ۔دوسری جانب مسلم لیگ(ن) کے مرکزی رہنما حمزہ شہباز کیمپ جیل میں قید پارٹی رہنماؤں سے ملاقاتوں کے لئے پہنچے جہاں انہوں نے خواجہ سعد رفیق ، سلمان رفیق ، حنیف عباسی اور حافظ نعمان سے ملاقاتیں کی ۔ذرائع کے مطابق ملاقاتوں میں نیب مقدمات اور سیاسی منظر نامے پر گفتگو ہوئی۔خواجہ برادران نے شکوہ کیا کہ نیب ابھی بھی ہمارے خاندان کو ہراساں کر رہا ہے۔حمزہ شہباز نے رہنماؤں کو یقین دہانی کروائی کہ پارٹی آپ کے ساتھ کھڑی ہے، ان مقدمات میں سے کچھ بھی نہیں نکلنا،جلد تمام مقدمات سے سرخرو ہونگے۔انہوں نے کہا کہ پی کے ایل آئی کے حوالے سے سپریم کورٹ کا فیصلہ ہمارے موقف کی جیت ہے۔حمزہ شہباز کی لیگی رہنماؤں سے دو گھنٹوں تک ملاقات جاری رہی جس کے بعد وہ واپس روانہ ہو گئے ۔
