اسلام آباد (این این آئی)پاکستان مسلم لیگ (ن)کے رہنما سینیٹر مشاہد اللہ خان نے کہا ہے کہ سعودی عرب کی جیلوں سے رہائی کا حکم اچھا اقدام ہے، اگر سعودی عرب سے انوسٹمنٹ آئی ہے تو نہایت اچھی بات ہے، راجہ ظفر الحق اور میری ملاقات ہوئی ہے ، بھری محفل میں سعودی ولی عہد نے کہا نواز شریف ہمارے دل کے قریب ہیں۔

پیر کو میڈیا سے بات چیت کرتے ہوئے سینیٹر مشاہد اللہ خان نے کہا کہ سعودی عرب کی جیلوں سے رہائی کا حکم اچھا اقدام ہے ۔ مشاہد اللہ خان نے کہاکہ اگر یہ حکم ہو گیا ہے تو پوری قوم کو شکریہ ادا کرنا چاہیے ۔ اپوزیشن کو نہ بلانے پر انہوں نے کہا کہ یہ حکومت میچور نہیں ہے ۔ مشاہداللہ خان نے کہاکہ ماضی کی حکومتوں نے ایسا نہیں کیا تھا کہ اپوزیشن کو رد کیا جائے ۔انہوںنے کہاکہ پتہ نہیں انہیں کس نے مشورہ کیا ہے کہ اپوزیشن کو نہ بلائیں۔ راجہ ظفر الحق صاحب اور میری سعودی ولی عہد سے بہت اچھی ملاقات رہی ۔ مشاہد اللہ خان نے کہاکہ ہر بات ماضی پر نہیں ڈالنی چاہیے کہ انہوں نے کچھ نہیں کیا ۔ انہوں نے کہاکہ ایک بڑی انویسٹمنٹ اگر سعودی عرب سے آرہی ہے تو نہایت اچھی بات ہے۔ مشاہد اللہ خان نے کہاکہ بھری محفل میں سعودی ولی عہد نے کہا کہ نواز شریف ہمارے دل کے قریب ہیں۔مشاہد اللہ خان نے کہا کہ ہم نے بھی انہیں نوازشریف کی طرف سے نیک تمنائیں پہنچائیں۔ انہوںنے کہاکہ میں نے سعودی ولی عہد کو کہا کہ آپ بھارت جا رہے ہیں،کشمیر کا مسئلہ امہ کا مسئلہ ہے یہ خطے کا مسئلہ ہے۔