امریکا(مانیٹرنگ ڈیسک) کیا آپ کو اس انڈے کی تصویر یاد ہے جس نے انسٹاگرام پر سب سے زیادہ لائیک کیے جانے کا اعزاز اپنے نام کرلیا تھا؟اگر نہیں تو جان لیں کہ اس تصویر کو اب تک 5 کروڑ 20 لاکھ سے زائد افراد لائیک کرچکے ہیں جبکہ اس ورلڈ ریکارڈ ایگ نامی انسٹاگرام اکاؤنٹ کے فالورز بھی ایک کروڑ تک پہنچ چکے ہیں۔اور اب اس انڈے نے اپنی شہرت کو اچھے مقاصد کے لیے استعمال کرنا شروع کردیا ہے۔

گزشتہ شب امریکا میں سپر باؤل کے موقع پر اس انسٹاگرام اکاؤنٹ نے اسٹریمنگ کمپنی ہولو کے ساتھ اشتراک کرتے ہوئے ذہنی صحت کے حوالے سے شعور اجاگر کرنے والا اشتہار پیش کیا۔اشتہار میں کہا گیا ‘حال ہی میں، میرا خول چٹخنا شروع ہوا، جس کی وجہ مجھ پر سوشل میڈیا کا دباؤ تھا’۔ جس کے بعد انڈے کے ٹکڑے ہوجاتے ہیں اور پھر لکھا آتا ہے ‘ اگر آپ کو بھی مشکل کا سامنا ہے تو کسی سے بات کریں’۔اس کے بعد انڈے کو دوبارہ درست حالت میں دکھایا گیا ہے جبکہ ذہنی صحت کے حوالے سے ایک ویب سائٹ کا لنک دیا گیا۔ویسے اگر آپ جاننا چاہتے ہیں کہ یہ اکاؤنٹ کس کا ہے تو یہ کوئی مشہور نام نہیں۔نیویارک ٹائمز کی ایک رپورٹ کے مطابق درحقیقت یہ لندن سے تعلق رکھنے والے 29 سالہ کرس گاڈفرے نے اکاؤنٹ بنایا جو کہ اشتہاری صنعت سے منسلک ہیں، اس کے لیے انہوں نے اپنے دو دوستوں الیسا خان اور سی جی براؤن کی مدد لی اور انڈے کو بنایا جسے یوجین کا نام دیا گیا۔انہوں نے یہ اس انڈے کو اس چیلنج کے ساتھ پوسٹ کیا تھا کہ وہ کائیلی جینر کے سب سے زیادہ لائیک فوٹو کا ریکارڈ توڑیں گے۔دوستوں کے اس گروپ نے نوٹس کیا کہ اس انڈے کے سب سے زیادہ مداح انسٹاگرام کے نوجوان صارفین ہیں۔اس اکاؤنٹ پر اب تک صرف 6 پوسٹس ہوئی ہیں مگر اس کی مقبولیت کے پیش نظر یہ کہنا غلط نہیں کہ اس کی مالیت بہت زیادہ ہوچکی ہے۔بچوں اور نوجوانی میں اس کی مقبولیت کو دیکھتے ہوئے مثبت پیغام کو شیئر کرنے کو سوشل میڈیا صارفین کے کافی سراہا ہے۔