لاہور ( این این آئی) احتساب عدالت نے قومی اداروں کے سربراہان کے نام سے فراڈ کرنے والے ملزم فاروق کے جسمانی ریمانڈ جبکہ اسکی بیوی کے جوڈیشل ریمانڈ میں 9 روز کی توسیع کردی۔احتساب عدالت کے جج نجم الحسن بخاری نے کیس پر سماعت کی۔نیب پراسیکیوٹر نے بتایا کہ ملزم فاروق اور اسکی اہلیہ طیبہ لوگوں کو کاروباری تعلقات اور نیب و آئی ایس آئی سے کام کروانے کے نام پر لوٹتے تھے، ملزمان سستے بلڈوزر دلانے کے نام پر لوگوں کی مجبوریوں کا فائدہ اٹھا کر ان سے پیسے بٹورتے رہے۔ملزمان کے مطابق ماڈل ہاؤسنگ سوسائٹی

چنیوٹ کے مالک سردار اعظم سے پلاٹ خریدا، جسکا قبضہ نہیں دیاگیا،متعلقہ حکام کو شکایات کرنے پر سردار اعظم نے ان کے خلاف مختلف دفعات کے تحت 28 مقدمات درج کروا دئیے جو سب خارج ہو گئیں، سردار اعظم اور نیب کے تفتیشی عابد حسین کی ملی بھگت سے ان کے خلاف نیب کا کیس بنایا دیا گیا، سردار اعظم اپنی غلطی مان کر ہمیں ایف آئی اے میں 13 لاکھ روپے دے چکا ہے۔ عدالت نے ملزم فاروق کے جسمانی ریمانڈ جبکہ اسکی بیوی کے جوڈیشل ریمانڈ میں 9 روز کی توسیع کر تے ہوئے کیس پر مزید سماعت 4 فروری تک ملتوی کردی۔