پشاور(این این آئی)وفاقی وزیر مذہبی امور نورالحق قادری نے کہا ہے کہ سانحہ ساہیوال افسوناک واقعہ ہے جس کی جتنی بھی مذمت کی جائے کم ہے اور اس کے ذمہ داروں کو عبرتناک سزا دی جائے گی۔ایک انٹرویومیں نورالحق قادری نے کہا کہ سانحہ ساہیوال افسوناک واقعہ ہے، جس کی جتنی بھی مذمت کی جائے کم ہے، وفاق اور پنجاب حکومت اس معاملے پرمتحرک ہے، جے آئی ٹی کی رپورٹ میں سی ٹی ڈی کے اعلی حکام کو پہلی بار ذمہ دار قرار دیا گیا ہے اور ذمہ داروں کوعبرتناک سزا بھی دی جائے گی۔نورالحق قادری نے کہا کہ مسلم لیگ (ن) اورپیپلزپارٹی تحریک انصاف

حکومت سے خوفزدہ ہے، دونوں کو معلوم ہے کہ اگرپی ٹی آئی نے پانچ سال پورے کئے تو ان کی حکومت کبھی نہیں آئے گی، وزیرخزانہ اسد عمر 50 سال کا گند 4 ماہ میں صاف نہیں کرسکتے، آئی ایم ایف سے قرضہ ان کی شرائط پر نہیں اپنی شرائط پر لیں گے۔وفاقی وزیرنے کہا کہ آپریشن کی وجہ سے فاٹا میں مردم شماری صحیح نہیں ہوئی، فاٹا میں دوبارہ ٹھیک طرح مردم شماری ہونی چاہیے، اس وقت فاٹا کو صوبائی اسمبلی کی 16 نشستیں دی گئی ہیں جبکہ 26 ہونی چاہئیں، فاٹا میں راتوں رات عدالتیں قائم نہیں ہوسکتیں، اس کے لئے وقت درکار ہے۔