اسلا م آباد(نیوزڈیسک )کوئٹہ پولیس نے زیارت میں قائداعظم ریذیڈنسی پر حملے میں ملوث مرکزی ملزم کو گرفتار کرنے کا دعویٰ کیا ہے۔ایک پریس کانفرنس کے دوران سینئر سپرٹینڈنٹ پولیس (آپریشنز) اعتزاز احمد گورایہ نے بتایا کہ کوئٹہ کے علاقے ہزار گنجی میں کامیاب آپریشن کے دوران زیارت کی قائداعظم ریذیڈنسی پر حملے میں ملوث مرکزی ملزم پکار عرف پکو کو حراست میں لے لیا گیا۔انہوں نے بتایا کہ ملزم ضلع شاہ رگ ہرنائی کا رہنے والا تھا جو قائداعظم ریذیڈنسی پر حملے کے مقدمے میں نامزد تھا۔خیال رہے کہ مسلح افراد نے پندرہ جون 2013 کو زیارت میں قائداعظم ریذیڈنسی پر حملہ کیا تھا۔ایس ایس پی آپریشنز نے بتایا کہ اب تک قائداعظم ریذیڈنسی پر حملے میں ملوث دس ملزمان کو گرفتار کیا جاچکا ہے۔انہوں نے بتایا کہ پولیس نے مرکزی ملزم کی گرفتاری کے لیے کارروائی خفیہ معلومات ملنے پر کی اور اس کا تعلق کالعدم عسکریت پسند تنظیم سے ہے۔